Ózbekstan Respublikası Prezidenti Shavkat Mirziyoev 2-iyul kúni mámleketlik sapar menen Tbilisi qalasına keldi.

Shota Rustaveli atındaǵı xalıqaralıq aeroportta mámleketimiz basshısın Gruziya Bas ministriniń orınbasarı, sırtqı isler ministri Maka Bochorishvili hám basqa da rásmiyler kútip aldı.

Joqarı mártebeli miymannıń húrmetine eki eldiń mámleketlik bayraqları kóterildi hám húrmetli qarawıl sap tarttı.

Soń Tbilisi qalasında Gruziya Prezidentiniń rezidenciyası – Orbeliani sarayında Ózbekstan Respublikası Prezidenti Shavkat Mirziyoevti rásmiy kútip alıwǵa baǵıshlanǵan saltanatlı máresim bolıp ótti.

Mámleketimiz basshısın Gruziya Prezidenti Mixail Kavelashvili qızǵın kútip aldı.

Joqarı mártebeli miyman húrmetine rezidenciya aldındaǵı maydanda eki eldiń mámleketlik bayraqları kóterildi hám húrmetli qarawıl sap tarttı.
Mámleketlik gimnler jańladı. Jetekshiler áskeriy orkestr cazları astında húrmetli qarawıl qatarı aldınan ótip, rásmiy delegaciyalar aǵzaların qutlıqladı.
Gruziyaǵa mámleketlik sapar sheńberinde Tbilisi qalasındaǵı Orbeliani sarayında Ózbekstan Respublikası Prezidenti Shavkat Mirziyoev hám Gruziya Prezidenti Mixail Kavelashvilidiń sóylesiwleri bolıp ótti.

Ózbekstan – Gruziya kóp táreleme qatnasıqların bunnan bılay da keńeytiw máseleleri kórip shıǵıldı.

Mámleketimiz basshısı Gruziya Prezidentine shın júrekten miymandoslıq ushın minnetdarshılıq bildirip, bul mámleketke sońǵı 23 jılda birinshi márte mámleketlik sapar ámelge asırılıp atırǵanın ayrıqsha atap ótti.

Parlamentler, húkimetler hám isbilermen toparlar arasındaǵı baylanıslar jedelleskeni qanaatlanıwshılıq penen atap ótildi.

Ótken jıldıń juwmaqlarına bola, tovar almasıw kólemi 270 million dollarǵa jetti, birgeliktegi joybar hám kárxanalardıń sanı artıp barmaqta. Mámleketimizde Gruziyanıń birinshi sanlı banki – “TBC” tabıslı jumıs alıp barmaqta. Tashkent penen Tbilisi hám Batumi qalaları arasında tikkeley aviaqatnawlar ámelge asırılmaqta. Usı jıldıń mart ayında Ózbekstan paytaxtında Gruziya mádeniyatı kúnleri tabıslı ótkerildi.

Óz-ara sawda kólemin, sonıń ishinde, Poti hám Batumi portlarınıń potencialınan nátiyjeli paydalanıw arqalı jáne de arttırıw máselelerine tiykarǵı itibar qaratıldı.
Farmacevtika, ximiya sanaatı, awıl xojalıǵı, transport, energetika, sanlı texnologiyalar hám turizm tarawlarında kooperaciyanı rawajlandırıw ushın imkaniyatlar bar ekenligi kórsetip ótildi.

Isbilermenlik, turistlik hám gumanitarlıq almasıwlardı jolǵa qoyıw ushın aymaqlar arasındaǵı baylanıslardı keńeytiw áhmiyetli ekenligi atap ótildi.
Ushırasıw juwmaǵında Shavkat Mirziyoev Mixail Kavelashvilidi mámleketimizge sapar menen keliwge mirát etti.

Tbilisi qalasındaǵı ilajlar sheńberinde Ózbekstan Respublikası Prezidenti Shavkat Mirziyoevti Gruziyanıń joqarı mámleketlik sıylıǵı – “Altın runo” ordeni menen sıylıqlaw máresimi bolıp ótti.

Ózbekstan – Gruziya kóp tárepleme qatnasıqların rawajlandırıwǵa qosqan úlken úlesi ushın mámleketimiz basshısına bul sıylıqtı Gruziya Prezidenti Mixail Kavelashvili tapsırdı.

Ózbekstan jetekshisi Gruziya Prezidenti Mixail Kavelashvili, Bas ministri Irakliy Kobaxidze hám Parlament Baslıǵı Shalva Papuashvilige joqarı sıylıq ushın minnetdarshılıq bildirip, dos Gruziya xalqına tınıshlıq, abadanlıq hám rawajlanıw tiledi.

1998-jılı shólkemlestirilgen “Altın runo” ordeni mámlekettiń joqarı mámleketlik sıylıqlarınan biri bolıp, sırt mámleketler hám xalıqaralıq shólkemler menen baylanıslardı bekkemlew jáne gruzin mádeniyatın, ilimin hám kórkem ónerin úgit-násiyatlaw baǵdarındaǵı ayrıqsha xızmetleri ushın beriledi.

Ordenniń atı Altın runo haqqındaǵı áyyemgi grek ápsanası hám házirgi Gruziya aymaǵında jaylasqan tariyxıy úlke – Kolxida menen baylanıslı.

Hár qıylı jıllarda bul joqarı sıylıq penen Ullı Britaniya Patshası Elizaveta II, Iordaniya Patshası Abdulla II, Germaniya Kancleri Gerxard Shryoder, Túrkiya Prezidenti Rejep Tayyip Erdoǵan, Ázerbayjan Prezidenti Geydar Aliev hám basqalar sıylıqlanǵan.

Sonday-aq, mámleketimiz basshısı Orbeliani sarayınıń Húrmetli miymanlar kitabına jaqsı tileklerin jazıp qaldırdı.

Ózbekstan Respublikası Prezidenti Shavkat Mirziyoevtiń Gruziyaǵa mámleketlik saparı dawam etpekte.

ÓzA