Tashkent qalasında Xalıqaralıq valyuta qorı hám Jáhán bankiniń “Shveycariya toparı” gezektegi májilisi sheńberinde “Óz-ara baylanıslılıq: regionallıq birge islesiw, jeke menshik sektor investiciyaları hám ashıq sawda” atamasında joqarı dárejedegi xalıqaralıq seminar bolıp ótti.

Jergilikli hám sırt el mámleketlik uyımlarınıń wákilleri, xalıqaralıq finans institutlarınıń basshıları, ekspertler hám qánigeler qatnasqan ilajda region mámleketleri arasında ekonomikalıq birge islesiwdi keńeytiw, jeke menshik sektor investiciyaların xoshametlew, sawda qatnasıqların bunnan bılay da erkinlestiriw hám transport-logistika baylanıslılıǵın bekkemlewdiń áhmiyetli máseleleri dodalandı.

Ilajda Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov, Jáhán bankiniń Evropa hám Oraylıq Aziya boyınsha vice-prezidenti Antonella Bassani hám basqa da joqarı mártebeli qatnasıwshılar shıǵıp sóylep, búgingi globallıq ekonomikalıq sharayatta regionallıq birge islesiw turaqlı ekonomikalıq ósiwdi támiyinlew, investiciyalardı tartıw hám mámleketlerdiń básekige shıdamlılıǵın arttırıwdıń áhmiyetli faktorı ekenin atap ótti.

Dodalawlar waqtında transport hám logistika baǵdarların diversifikaciyalaw, sawda qárejetlerin qısqartıw, qońsı mámleketler menen ekonomikalıq integraciyanı tereńlestiriw hám óz-ara paydalı baylanıslardı keńeytiw tiykarǵı wazıypalar sıpatında atap ótildi.

Sonnan kelip shıǵıp, seminardıń tiykarǵı bólimi sanlı infrastruktura, energetika, transport hám sawda jolların rawajlandırıw, transshegaralıq birge islesiwdi keńeytiw hám jeke menshik sektor investiciyaların tartıw máselelerine baǵıshlandı. Atap ótilgenindey, bunday joybarlar Oraylıq Aziya mámleketleri arasındaǵı ekonomikalıq baylanıslardı bekkemlew, sawda kólemin arttırıw hám jańa investiciyalıq imkaniyatlardı jaratıwda úlken áhmiyetke iye.

Seminarda Ózbekstannıń Jáhán sawda shólkemine aǵza bolıw jolında ámelge asırıp atırǵan izbe-iz reformaları da ayrıqsha atap ótildi. Atap aytqanda, milliy nızamshılıqtı xalıqaralıq standartlarǵa beyimlestiriw, tártipke salıw mexanizmlerin jetilistiriw jáne investorlar ushın ashıq-aydın hám boljaw múmkin bolǵan biznes ortalıǵın qáliplestiriw mámlekettiń jáhán ekonomikasına integraciyalasıwında ayrıqsha áhmiyetke ie ekeni atap ótildi.

– Seminar dawamında Jáhán banki toparı, Xalıqaralıq valyuta qorı hám basqa da xalıqaralıq finans institutlarınıń regionallıq ekonomikalıq baslamalardı qollap-quwatlawdaǵı áhmiyetli ornına ayrıqsha itibar qaratıldı. Alǵa qoyılǵan baslama hám usınıslar regionallıq ekonomikalıq integraciyanı jáne de tereńlestiriw, investiciyalıq ortalıqtı jetilistiriw hám jeke menshik sektordıń qatnasın keńeytiwge xızmet etedi. Eń áhmiyetlisi, bunday sóylesiwler mámleketler arasındaǵı óz-ara isenim hám ekonomikalıq sheriklikti bekkemlep, jańa qospa joybarlardı ámelge asırıw ushın bekkem tiykar jaratadı, – dedi Ekonomika hám qarjı ministriniń baspasóz xatkeri – málimleme siyasatı máseleleri boyınsha keńesgóyi Rushana Umarova.

Dodalawlar juwmaǵında qatnasıwshılar regionallıq birge islesiwdi bunnan bılay da bekkemlew, tiykarǵı infrastrukturalıq joybarlarǵa mámleketlik hám jeke menshik investiciyalardı keńnen tartıw, ashıq hám qaǵıydalarǵa tiykarlanǵan sawda sistemasın rawajlandırıw boyınsha ámeliy birge islesiwdi izbe-iz dawam ettiriw áhmiyetli ekenligin atap ótti.

Atap ótilgenindey, bul baǵdarlardaǵı háreketler Oraylıq Aziyada turaqlı ekonomikalıq ósiwdi támiyinlew, jańa investiciyalıq imkaniyatlardı jaratıw hám mámleketler arasındaǵı ekonomikalıq integraciyanı jáne de tereńlestiriwge xızmet etedi.

N. ZIYoDULLAEVA,
ÓzAnıń xabarshısı