Paytaxtımızda máhállelerde jasawshı jaslar arasında «Bes baslama olimpiadası» sheńberinde Kurash milliy sport túri boyınsha Bas prokuror kuboginiń Nókis qalalıq basqıshı bolıp ótti. Jarısqa sporttıń usı túrine qızıǵıwshı 23 máhálleden jas palwanlar qatnastı. Oǵada qızıqlı bellesiwlerge bay bolǵan jarıs sońında 66 kg salmaqta Botanika baǵı mákan puqaralar jıyını aymaǵınan Álibek Baymuratov, 73 kg da Allaniyaz qaharman MPJdan Shaxrux Joldasbaev, 81 kg da Uzınkólden Aynatdin Qalbaev, 90 kg da Jasıl baǵdan Aybek Amanshaev, eń awır salmaqta, yaǵnıy +90 kg da Qutlı qonıstan Ruslan Erniyazovlar birinshi orındı iyelewge miyasar boldı.
Al, qızlar arasında ótkerilgen bellesiwlerde bolsa, 48 kg da Jańa zaman mákan puqaralar jıyınınan Shaxzada Perdebaeva, 57 hám 70 kg da Isbilermenler aymaǵı MPJdan Eldana Aqbolat, Tumaris Sultamuratova, 87 kg da Qızılqum elatınan Janar Ibragimovalar jarıs jeńimpazına aylandı.
– Jarıs xalıq aralıq kurash qaǵıydalarına muwapıq ótkerildi, – deydi Qaraqalpaqstan Respublikasi kurash federaciyasınıń Nókis qalalıq bólimi atqarıwshı direktorı Jamshid Turabaev. – Bellesiwlerdi Qaraqalpaqstan Respublikasi kurash federaciyasınıń usınısına tiykarlanıp, Sport ministrligi tárepinen tastıyıqlanǵan tóreshiler basqarıp bardı.
Ótkerilgen jarıs sońında Nókis qalası Prokurorı R.Bawaddinov, Nókis qalası Jaslar isler agentligi bólim baslıǵı M.Abdiramanov, Qaraqalpaqstan Respublikasi kurash federaciyasınıń atqarıwshı direktorı S.Jusipbekovlar jeńimpazlardı qutlıqlap, olarǵa shólkemlestiriwshiler tárepinen tayarlanǵan arnawlı diplom, medal hám estelik sawǵalardı tapsırdı.
Adilbay Orazov,
Qaraqalpaqstan xabar agentligi sholıwshısı