Hár jılı 500 mıń ul-qızdı zamanagóy kásipke iye bolıwın támiyinleytuǵın “Keleshek bilimleri ekosisteması” jolǵa qoyıladı.
Qolında kásibi bolıp, xalıqaralıq talaplar tiykarında jańa kónlikpelerdi iyelewdi qálegen jaslarǵa “kásip vaucheri”n beriw jolǵa qoyıladı. Bul “kásip vaucheri” procentsiz ssuda túrinde bolıp, hár jılı 50 mıń jastıń zamanagóy kásiplerdi úyreniw qárejetleri qaplap beriledi.
Xalıqaralıq kásiplik tańlawlarda jeńimpaz bolǵan mámleketlik hám jeke menshik texnikum oqıwshıları 100 million sumnan, olardı tayarlaǵan ustazları 50 million sumnan sıylıq aladı.
Joqarı oqıw ornı pitkeriwshisin jumısqa alǵan isbilermenge jas qánige ushın dáramat hám sociallıq salıq bir jıl ishinde 1 procent etip belgilenedi.
Jaslar ushın kásip hám til úyreniw, jumısqa jaylasıw, isbilermenlik boyınsha onlaǵan xızmetler bar. Bul xızmetlerden “bir ayna” principi tiykarında paydalanıw ushın Jaslar xabları shólkemlestiriledi. Bul tájiriybe Surxandáryadan baslanıp, basqıshpa-basqısh basqa aymaqlarda da ǵalaba en jaydırıladı.
Jas liderlerdi anıqlaw boyınsha 5 baǵdarda “TOP-100” baǵdarlaması ámelge asırıladı. Baǵdarlama sheńberinde “jańa ekonomika,” IT hám jasalma intellekt, bilimlendiriw, medicina hám awıl xojalıǵı boyınsha elimizdegi jaslar hám sırt eldegi watanlaslarımız ushın ashıq tańlaw járiyalanadı.
Hár bir ministrlik hám tarmaq óz baǵdarında “TOP-100″ qábiletli jaslar” baǵdarlamasın baslaydı hám óz baǵdarındaǵı xalıqaralıq shólkemlerge stajirovkaǵa jiberedi.
Endi hár bir ministr, tarmaq basshısı hám hákimler “1 mıń máselege – jaslardan 1 mıń sheshim” joybarın iske qosadı.
Endi IT hám jasalma intellekt tarawları ushın kadrlar tayarlaytuǵın joqarı oqıw orınlarınıń 3-kurs studentleri IT parkte “dual bilimlendiriw” tiykarında oqıwdı dawam ettiredi.
Juwapkerlerge barlıq 15 IT park aymaǵında kompyuter hám mobil oyınlardı jaratıwshılar ushın inkubaciyalıq oray ashıp, milliy ruwxtaǵı oyınlardı kóbeytiw boyınsha jańa sistemanı jolǵa qoyıw tapsırıldı.
Qaraqalpaqstan xabar agentligi