Nókis qalasında futbol boyınsha Mámleketlik qáwipsizlik xızmeti kuboginiń Qaraqalpaqstan Respublikalıq basqıshı bolıp ótti.
Respublikamızdıń barlıq aymaqlarınan eń kúshli komandalar qatnasqan jarısta oyınlar oǵada qızıqlı bolıp ótip, yarım finalǵa Ámiwdárya, Kegeyli, Taxtakópir hám Ellikqala rayonlarınıń komandaları jetip keldi.
Keskin ótken yarım finalda Ámiwdárya rayonı Tolqın awıl puqaralar jıyını jasları Taxtakópir posyolkalıq puqaralar jıyını komandasın 2:1, Kegeyli rayonı Xalqabad MPJ komandası Ellikqala rayonı Paxtachi MPJ jasların 1:0 esabında jeńip shıǵıwǵa miyasar boldı.
Al, kubok jeńimpazlıǵı ushın ótkerilgen final oyınında bolsa, ámiwdáryalı jaslar Kegeyli rayonı komandasın 2:0 esabında jeńip, bas sıylıq iyesine aylandı.
Sıylı úshinshi orın ushın bolǵan bellesiwde bolsa, Paxtachi MPJ jasları Taxtakópir posyolkalıq puqaralar jıyını komandasın penaltiler seriyasında 3:1 esabında jeńip, qola medalı iyesine aylandı.
Adilbay Orazov,
Qaraqalpaqstan xabar agentligi sholıwshısı