Ózbekstan Respublikası Ministrler Kabineti “Paxta hám biyday jetistiriwshi awıl xojalıǵı subektlerin qollap-quwatlaw mexanizmlerin bunnan bılay da keńeytiw ilajları haqqında” qarar qabıl etti.
Oǵan muwapıq, Ózbekstan Respublikası Húkimetiniń 2021-jıl 11-marttaǵı 130-sanlı qararı, Ministrler Kabinetiniń “Paxta shiyki zatın jetistiriw hám paxta jıyın-terimi qárejetlerin kreditlew jáne olardı realizaciyalawdıń qosımsha ilajları haqqında”ǵı 2023-jıl 25-dekabrdegi 680-sanlı qararı, Ministrler Kabinetiniń “Paxta shiyki zatın jetistiriw qárejetlerin alternativ derekler esabınan qarjılandırıw hám nátiyjeli jumıs alıp barıp atırǵan awıl xojalıǵı subektlerin bunnan bılay da qollap-quwatlaw ilajları haqqında”ǵı 2025-jıl 24-iyuldegi 466-sanlı qararı, sonday-aq, Ministrler Kabinetiniń “Agrar hám azıq-awqat tarawların mámleket tárepinen qollap-quwatlaw sistemasın túp-tiykarınan jetilistiriw ilajları haqqında”ǵı 2026-jıl 28-apreldegi 206-sanlı qararına ózgeris hám qosımshalar kirgiziledi.
Qararǵa bola, 2024-2025-jıllarda paxta shiyki zatın jetistiriw qárejetleri ushın fermer xojalıqlarına ajıratılǵan jeńilletilgen kreditlerdi qaytarıw múddeti, burınǵısınan basqasha tárizde, 2027-jıl 1-yanvarǵa shekem sozdırıladı.
Onda Ózbekstan Respublikası Ekonomika hám qarjı ministrligi janındaǵı Awıl xojalıǵın mámleket tárepinen qollap-quwatlaw qorı tárepinen 2024-2025-jıllarda paxta shiyki zatın jetistiriw qárejetlerin qarjılandırıw ushın kommerciyalıq banklerge jaylastırılǵan kredit resursların qaytarıw múddeti sáykes túrde sozdırıladı.
Ózbekstan Respublikası Sanlı texnologiyalar ministrligi, Ekonomika hám qarjı ministrligi Oraylıq bank penen birgelikte paxta, biyday hám miywe-ovoщ ónimlerin jetistiriwdi qarjılandırıw ushın buyırtpalardıń qáliplestiriliwi jáne jeńilletilgen kreditlerdiń jumsalıwında ashıq-aydınlıqtı támiyinlew maqsetinde 2026-jıl 1-iyulge shekem Qordıń “d-xarid.uz” málimleme sisteması Awıl xojalıǵı ministrligi hám kommerciyalıq banklerdiń programmalıq támiynatları menen integraciyalanadı.
Qarar menen Biyday jetistiriw ushın ajıratılǵan jeńilletilgen kreditlerdi ónim jılınıń 1-avgustına shekem qaytarǵan awıl xojalıǵı subektlerine usı kredit boyınsha tólengen procent tólemleriniń bir bólegin subsidiya sıpatında qaytarıw tártibi haqqındaǵı reje de tastıyıqlandı.
Usı Reje biyday jetistiriw qárejetleri ushın Ekonomika hám qarjı ministrligi janındaǵı Awıl xojalıǵın mámleket tárepinen qollap-quwatlaw qorınıń kredit resursları esabınan ajıratılǵan jeńilletilgen kreditlerdi ónim jılınıń 1-avgustına shekem tolıq qaytarǵan, shólkemlestiriw-huqıqıy formasına qaramastan, biyday jetistiriwshi barlıq awıl xojalıǵı subektlerine usı jeńilletilgen kreditler boyınsha tólengen procent tólemleriniń 4 procent punktin subsidiya sıpatında qaytarıw tártibin belgileydi.
ÓzA