Ózbekstan Respublikası Prezidenti Shavkat Mirziyoev 29-iyun kúni Jáhán bankiniń shólkemlestiriwshi mámleketleriniń “Shveycariya toparı” májilisinde qatnasıw ushın elimizde bolıp turǵan banktiń Evropa hám Oraylıq Aziya regionı boyınsha vice-prezidenti Antonella Bassani basshılıǵındaǵı delegaciyanı qabılladı.
Antonella Bassani mámleketimiz basshısına Jáhán banki prezidenti Ajay Banganıń qızǵın sálemin hám jaqsı tileklerin jetkerdi.
Jáhán banki toparı menen strategiyalıq birge islesiwdi Jańa Ózbekstanda alıp barılıp atırǵan strukturalıq reformalardıń tiykarǵı baǵdarları boyınsha keń kólemde rawajlandırıw máseleleri dodalandı.
Sońǵı jılları usı abıraylı xalıqaralıq finans institutı menen eki tárepleme baylanıslar hám konstruktivlik sheriklik misli kórilmegen dárejege kóterilgeni qanaatlanıwshılıq penen atap ótildi.
Ótken jılı sentyabr ayında Nyu-York qalasında Jáhán banki prezidenti menen erisilgen joqarı dárejedegi kelisimler izbe-iz ámelge asırılmaqta.
Birgeliktegi joybarlar portfeli 15 milliard dollardan arttı. Tashkent qalasında Jáhán bankiniń regionallıq ofisi tabıslı jumıs alıp barmaqta. Qarjılandırıwdıń jańa mexanizmleri nátiyjeli engizilmekte.
Usı jılı bolıp ótetuǵın Jáhán banki joqarı basshılıǵınıń saparları hám birgeliktegi ilajlarǵa puqta tayarlıq kóriw áhmiyetli ekenligi atap ótildi.
Sociallıq-ekonomikalıq rawajlanıwdıń eń tiykarǵı baǵdarların qamtıp alǵan jańa uzaq múddetli Mámleketlik baǵdarlamanı islep shıǵıw rejeleri qollap-quwatlandı.
Kishi hám orta biznesti rawajlandırıwǵa járdemlesiw, kámbaǵallıqtı qısqartıw ilajların ámelge asırıw, mámleketlik kárxanalardı menshiklestiriw boyınsha birgeliktegi baǵdarlamalardı alǵa qoyıw hám ekonomika tarmaqlarına jasalma intellekt texnologiyaların engiziwde Jáhán banki toparınıń finanslıq qurallarınan paydalanıwdı keńeytiwge ayrıqsha itibar qaratıldı.
Suw xojalıǵı tarawın qarjılandırıw, insan kapitalın rawajlandırıw, sonday-aq, Ózbekstannıń xalıqaralıq reytinglerdegi ornın jaqsılawǵa járdemlesiw máselelerinde tıǵız birge islesiwdi jolǵa qoyıw da tiykarǵı wazıypalardan biri sıpatında atap ótildi.
ÓzA