Ózbekstan mámleketlik kórkem óner hám mádeniyat institutı Nókis filialında «27-iyun – Baspasóz hám ǵalaba xabar quralları xızmetkerleri kúni» múnásibeti menen jurnalistler hám taraw xızmetkerleriniń qatnasıwında ushırasıw keshesi bolıp ótti.
Ilajda filial direktorı Q. Yusupov qatnasıwshılardı kásiplik bayramı menen qutlıqlap, elimizde ámelge asırılıp atırǵan reformalar hám mádeniyat, kórkem óner tarawındaǵı jańalıqlardı keń jámiyetshilikke jetkeriwde jurnalistlerdiń tutqan ornına toqtaldı hám olardıń miynetin joqarı bahaladı.
Ótkerilgen ilajda mádeniyat hám kórkem óner tarawın keń túrde sáwlelendiriwde belsendilik kórsetip júrgen bir qatar jurnalistlerge oqıw ornınıń «Húrmet jarlıǵı» hám estelik sawǵaları tapsırıldı.
Óz gezeginde jurnalistler kórsetilip atırǵan itibar hám qollap-quwatlaw ushın filial hákimshiligine minnetdarshılıq bildirip, aldaǵı waqıtta da tarawdıń jetiskenliklerin keńnen sáwlelendiriwde ayanbastan xızmet ete beretuǵınlıǵın atap ótti.
Sonday-aq, ilaj sheńberinde qatnasıwshılar ushın filialda alıp barılıp atırǵan oqıw, dóretiwshilik hám innovaciyalıq jumıslar menen tanıstırıw maqsetinde media-tur shólkemlestirildi. Álbette, bul jurnalistlerge filialdıń búgingi turmısı, studentlerdiń dóretiwshilik jetiskenlikleri hám zamanagóy imkaniyatları menen jaqınnan tanısıw imkaniyatın berdi.
Qaraqalpaqstan xabar agentligi