Adam qolı gúl. Insannıń miyneti menen abat bolǵan jerlerdi kórgende erksiz usı sózdi aytasań. Shóp-shar basıp, toǵaylıq bolǵan jerlerdi abat etip, jańa baslamalar jeteginde júrgen insanlar hár qashanda maqtawǵa ılayıqlı. Biz sońǵı waqıtlarda respublikamızda alıp barılıp atırǵan reformalar negizinde usınday abat bolǵan jerlerdiń talay márte gúwası bolmaqtamız.
Qaraqalpaqstan Respublikası kámbaǵallıqtı qısqartıw hám bántlik ministrligi baspasóz xızmeti tárepinen Kegeyli rayonı «Júzimbaǵ» APJ da jańadan qurılǵan ıssıxana jumısları menen tanısıw maqsetinde ǵalaba xabar quralları xızmetkerleriniń qatnasıwında ilaj shólkemlestirildi.
Prezidentimizdiń 2024-jıl 4-oktyabrdegi «Kámbaǵallıqtı qısqartıw hám bántlik tarawında mámleketlik siyasattı jetilistiriw hám nátiyjeliligin arttırıw ilajları haqqında»ǵı qararı tiykarında Ózbekstan Respublikası Kámbaǵallıqtı qısqartıw hám bántlik ministrligi qorı esabınan 5 gektar jer maydanǵa 7,5 mlrd. sum ajıratılıp, “STONE FOR BUSINESS” juwapkershiligi sheklengen jámiyeti tárepinen qurıp pitkerilgen ıssıxana usı jıldıń fevral ayınan baslap óz jumısın basladı. Shóp-shar basıp atırǵan jerdi abat etip, palız ónimlerin jetistirip, xalıqtıń dasturxanına jetkeriwdey inabatlı isti jolǵa qoyıwdıń jáne bir itibarlı tárepi sonda, kámbaǵallıq reestrinde turǵan puxaralardıń bántligin támiyinlew tiykarǵı maqset etip alınǵan.
– Íssıxanamızda 5 gektar jerge qıyar egilip, házirgi waqıtta jıynaǵan ónimdi ishki bazarǵa jetkerip berip atırmız. Jergilikli diyqanlar menen másláhátlesip, usı aymaqqa mas ekenligin inabatqa alıp qıyardıń fantino sortın ektik. Kúnine tórt tonna ónim jıynap alıp, ishki bazarǵa shıǵarıp atırmız. Qarıydarlardıń talabı boyınsha ónimdi jetkerip barip atırmız. Kem támiyinlengen shańaraqlardan 50 adamdı jumıs penen támiyinlegenbiz hám olar ıssı awqat, qolaylı sharayatlar menen támiyinlengen. Aldaǵı waqıtta pomidor, baklajan, qulpınay ónimin egip, jetistiriw niyetindemiz, – deydi kárxana baslıǵı, buxaralı isbilermen A.Xodjiev.
Kárxana baslıǵınıń aytıp ótkenindey ıssıxanada tájiriybe sıpatında egilgen qıyar óniminiń birinshi hasılı usı jıldıń aprel ayında jıynap alınǵan bolsa, búgingi kúnde ónimdi jıynawdıń sońǵı basqıshları dawam etpekte. Íssıxanada hár ayǵa 10 sotıx jer maydanı ajıratılıp, qıyar hám pomidor egiw jumısları ámelge asırıladı.
Kórip gúwası bolǵanımızday, jumısshılar ushın ıssı awqat óz waqtıda, awqatlanıw hám dush qabıl etiw orınları zaman talapları tiykarında islengen.
– Jumıssız edim. Ómirlik joldasım nawqas. Rayonlıq kámbaǵallıqtı qısqartıw hám bántlik bólimine jumıs sorap xabarlasqan edim. Olardıń usınısı menen usı jerge jumısqa óttim. Mine, házir fevral ayınınan baslap, yaǵnıy ıssıxana jumısın baslaǵan waqıttan berli qıyardı ekkennen baslap jumıs islep atırman. Dáramatımızdı óz waqtında alıp turmız. Student balamnıń oqıwına shártnama pulın tólep atırman, qızımdı tólemli oqıw kursında tayarlatıp atırman. Jumıs qıyın emes, jumıslı bolǵanıma quwanıshlıman, – deydi «Júzimbaǵ» APJ turǵını Saltanat Ádilbaeva.
Biz jumıs penen támiyinlengen awıl turǵınları menen sóyleser ekenbiz, bári de Saltanat apa sıyaqlı awıldan usınday ısıxana ashılǵanına hám jumıslı bolǵanına quwanıshlı.
Elimizde kámbaǵallıqtı qısqartıw hám xalıqtıń bántligin támiyinlew baǵdarında alıp barılıp atırǵan reformalar tiykarında erisilip atırǵan tabıslardıń biz jáne biriniń gúwası boldıq. Insanlardıń elimizde usınday imkaniyatlardıń jaratılıp atırǵanlıǵınan minnetdar ekenligin kórer ekenbiz, usınday awıllıq jerlerde zamanagóy ıssıxanalar qurıladı, bir waqıtlarda qıstıń qırawlı kúnlerinde bazardan satıp alatuǵın qıyar-pomidarlar alıs awıllıq jerlerde jetistiriledi hám xalıq óz úylerine jaqın jerlerden jumıs penen támiyinlenedi dep kim oylaptı deysiz. Álbette, bulardıń bári elimizde húrmetli Prezidentimiz basshılıǵında alıp barılıp atırǵan reformalardıń ámeldegi nátiyjeleri.
Gúlnara Turdıshova, Qaraqalpaqstan xabar agentligi