Qaraózek rayonında úy aldı qıytaq jerlerinen utımlı paydalanıp atırǵan shańaraqlar menen tanısıw maqsetinde ǵalaba xabar quralları wákilleriniń qatnasıwında media-tur shólkemlestirildi.
Media-tur qatnasıwshıları dáslep, Jańa Qaraózek PPJ aymaǵındaǵı kóp tarmaqlı diyqan xojalıǵı baslıǵı O.Sársenbaevtıń jumısları menen tanıstı.
Búgingi kúnde ol bul jerde, úy qaptalındaǵı egislik jerine 20 mıńnan aslam aq terek egip, qusshılıq, qoyan baǵıw menen shuǵıllanıp, diyqanshılıqtıń barlıq túrlerin atqarmaqta. Sonıń arqasında shańaraǵına hár jılı ortasha 80 million sumnan aslam dáramat keltirmekte. Media-tur qatnasıwshıları shańaraq aǵzalarınıń jumısları menen tanısıp, jetiskenlikleriniń gúwası boldı.
– Bul jerdi alǵan waqtımda ashıq dalanlıq edi. Úsh jılǵa shekem tárbiyalap jerdi kelege keltirdik. Dáslep aq terek ektik, tawıq baqtıq, waqıttıń ótiwi menen eginniń onlaǵan túrin egetuǵın boldıq, – deydi O.Sársenbaev. – Búgingi kúnde alma, erik, júzim, shabdal hám basqa da ovoщ eginleri egilmekte. Ayırım qońsılarımız da bir-birinen úyrenip, jerine egin egip, qosımsha dáramat tawıp jaqsı paydalana basladı.
Bunnan soń, usı aymaqta jasawshı S.Turdımuratovtıń ónermentshilik ustaxanasınıń jumısları, sonday-aq, Prezidentimizdiń tiyisli qararı menen jeńilletilgen kredit tiykarında alınǵan násilli qoylardı baǵıw, tárbiyalaw jumısları menen tanıstı.
Kúnniń ekinshi yarımında media-tur qatnasıwshıları, Mádeniyat APJda jasawshı jas isbilermen hám diyqan G.Turdımuratovtıń úy qaptalındaǵı ıssıxanada jetistirilip atırǵan ónimlerdi barıp kórdi. Usı aymaqtaǵı A.Qurbanbaevtıń baǵshılıq jumısların da úyrenip, xalqımızǵa arzan bahalarda xızmet kórsetip atırǵanlıǵınıń gúwası boldı.
Media-tur juwmaǵında rayon hákimliginde ǵalaba xabar quralları wákilleriniń qatnasıwında baspasóz konferenciyası shólkemlestirildi.
Onda rayon hákiminiń birinshi orınbasarı A.Sársenbaev Qaraózek rayonı kámbaǵallıqtı qısqartıw hám bántlikke kómeklesiw bóliminiń, ijara jer maydanları hám qıytaq jer maydanlarınan nátiyjeli paydalanıwdı shólkemlestiriw boyınsha 2026-jıldıń 6 ayı dawamında alıp barılǵan jumıslar boyınsha maǵlıwmat berdi.
Atap ótilgenindey, Qaraózek rayonı boyınsha 9262 shańaraqtıń jámi 627 gektarlıq úy aldı qıytaq jerleri bolıp, ijaraǵa alınǵan 1258 lotlarda 963 gektar jer maydanları bar.
Ózbekstan Respublikası Prezidentiniń 2025-jılı 14-fevral kúngi PP-22-sanlı parmanına tiykarlanıp rayon aymaǵında 2025-jılı suw jetip barıwı qıyın bolǵan 20 xojalıqqa, al 2026-jılı 8 xojalıqqa kishi quwatlı jer kranları qurıp berildi.
Sonday-aq 2025-jıl dawamında aymaqlardaǵı hákim járdemshileri tárepinen jeńilletilgen kredit esabınnan 12-puqaraǵa 2 sotixlı
12 ıssıxana hám rayon hákiminiń qáwenderliginde 2 sotixlı
20 ıssıxana alıp berildi.
Sonday-aq, ijara jer maydanlarına iye puqaralar menen de máhállelerdegi hákim járdemshileri menen birgelikte jerlerine házirgi kúnde bazarı shaqqan, joqarı dáramatlı eginlerdi egiwdi túsindiriw boyınsha jumıslar alıp barılmaqta.
Ilaj dawakmında qatnasıwshılar ózlerin qızıqtırǵan sorawlarǵa juwap aldı.
Á.Jiyemuratov,
Qaraqalpaqstan xabar agentligi