Bul haqqında Ekonomika hám qarjı ministrliginiń málimleme xızmeti xabar berdi. Onda atap ótiliwinshe, “Moody’s” xalıqaralıq reyting agentligi Ózbekstannıń suveren kredit reytingin bir tekshe joqarılatıp, “Ba3” ten “Ba2” ge kóterdi. Reyting kútilmesi bolsa unamlıdan turaqlıǵa ózgertildi.
Agentlik bul qarardı mámlekette institucionallıq reformalar izbe-iz dawam etip atırǵanı, ekonomikalıq siyasattıń nátiyjeliligi artıp atırǵanı jáne ekonomikalıq hám fiskal turaqlılıq bekkemlenip atırǵanı menen túsindirdi.
Atap ótiliwinshe, sońǵı bir jılda Ózbekstannıń suveren kredit reytingi altı márte jaqsılanǵan bolıp, bul jańa qarız qarjıların tartıw qárejetlerin ortasha 1,5 procentke azaytıw imkaniyatın bergen. Sonday-aq, reytingtiń ósiwi nátiyjesinde 20 dan aslam bank hám kárxanalardıń reytingleri de jaqsılanıp, olardıń sırtqı qarız tartıw qárejetleri azayǵan.
“Moody’s” esabatında ekonomikanıń diversifikaciyalanıwı, byudjet tártibiniń kúsheyiwi, mámleket qatnasıwın qısqartıw, energetika tarawın liberallastırıw hám menshiklestiriw processleri unamlı bahalanǵan.
Agentliktiń maǵlıwmatlarına bola, Ózbekstan ekonomikası sırtqı qáwip-qáterlerge qaramastan joqarı ósiw pátlerin saqlap qalmaqta. Atap aytqanda, ekonomikalıq ósiw 2025-jılı 7,7 procentti, 2026-jıldıń birinshi shereginde bolsa 8,7 procentti quradı.
Sonıń menen birge, xalıqaralıq rezervlerdiń joqarı dárejesi, byudjet deficitiniń qısqarıwı hám mámleket qarızınıń turaqlı saqlanıwı mámlekettiń kredit qábiletin qollap-quwatlawshı áhmiyetli faktorlar sıpatında tán alınǵan.
N.Ziyodullaeva, ÓzA