Qaraqalpaqstan Respublikası Bajıxana basqarmasında ǵalaba xabar quralları wákilleriniń qatnasıwında baspasóz konferenciyası bolıp ótti.
Ashıqtan-ashıq sóylesiw tárizinde shólkemlestirilgen bul ushırasıwdı basqarma baslıǵı B.Qutlımuratov alıp bardı hám bajıxana nızamshılıǵındaǵı ózgerisler hám jańalanıwlar, basqarmanıń tiykarǵı kórsetkishleri haqqında maǵlıwmat berdi.
Atap ótilgenindey, Qaraqalpaqstan Respublikası Bajıxana basqarması quramındaǵı shegara bajıxana postı arqalı háreketlengen jolawshılar boyınsha postlar kesiminde hám jámi háreketlengen puqaralarımız kiriwde 137702, shıǵıwda 181939 adamdı quradı.
Qáwipti basqarıwdıń avtomatlastırılǵan sisteması tárepinen jámi 12 435 bajıxana júk deklaraciyası rásmiylestirildi. Esap beriw dáwirinde bajıxana tarawına baylanıslı nızam hújjetleriniń buzılıwına baylanıslı 394 huqıqbuzarlıq jaǵdayları anıqlanıp, bahası 19 milliard 250 million sumlıq tovar-materiallıq baylıqlar ayǵaqlı dálil sıpatında alındı. Sonnan jámi 11 jaǵdayda Ózbekstan Respublikası Jınayat kodeksiniń tiyisli statyaları boyınsha jınayat isi qozǵatıldı.
Qaraqalpaqstan Respublikası Bajıxana basqarması mısalında, ótken 2026-jıldıń 5 ayı dawamında tovarlardıń sırtqı sawdası (arnawlı eksporttan tısqarı) 411,7 mln. AQSh dollarınan ibarat bolıp, 2025-jıldıń usı dáwirine salıstırǵanda 101,2 mln. AQSh dollarına (yaki 32,6 procentke) kóbeygen. Sonnan basqarma tárepinen bahası 130,8 million AQSh dollarınan aslam ónimler eksport bajıxana rejimine rásmiylestirildi.
Ulıwma bahası 280,9 million AQSh dollarına teń ónimler basqarma tárepinen import bajıxana rejimine rásmiylestirildi.
Mámleketimiz basshısı hám húkimetimiz tárepinen isbilermenlik subektlerine básekige shıdamlı ónimlerdi islep shıǵarıw arqalı eksport kólemin arttırıw hám importtı optimallastırıw jolında qabıl etilgen nızam hújjetlerinde belgilengen wazıypalardan kelip shıǵıp, bajıxana uyımları tárepinen ótken 2026-jıldıń 5 ayı dawamında SEJ qatnasıwshılarına jámi 465 mlrd. 88 mln. sum muǵdarında bajıxana tólemlerinen jeńillikler qollanıldı.
2026-jıldıń yanvar-may ayları dawamında televidenie arqalı 132 kórsetiwde, radio arqalı 61 esittiriwde material jiberilip, baspasóz hám elektron basılımlarda 490 maqala basıp shıǵarıldı.
Ilajda basqarma baslıǵı B.Qutlımuratov 27-iyun – Baspasóz hám ǵalaba xabar quralları xızmetkerleri kúni múnásibeti menen taraw wákillerin qızǵın qutlıqlap, bajıxana jumısın keń jámiyetshilikke jetkeriwde jaqınnan birge islesip atırǵan bir topar ǵalaba xabar quralları wákillerine minnetdarshılıq bildirdi. Bajıxana komitetiniń tiyisli buyrıǵı menen de estelik sawǵaları tapsırıldı.
Ilaj dawamında qatnasıwshılar ózlerin qızıqtırǵan sorawlarǵa juwap aldı.
Á.Jiyemuratov,
Qaraqalpaqstan xabar agentligi