ÓzLiDeP Qaraqalpaqstan Respublikası Keńesiniń baslaması menen ámelge asırılıp atırǵan “Jas fermerler mektebi” joybarı sheńberinde bir topar volontyor jaslar Aralboyı xalıqaralıq innovaciya orayına bardı. Sapardıń tiykarǵı maqseti jaslardıń awıl xojalıǵı tarawındaǵı bilim hám kónlikpelerin arttırıw, olardı zamanagóy agrotexnologiyalar, innovaciyalıq kózqaraslar hám aldınǵı tájiriybeler menen jaqınnan tanıstırıwdan ibarat boldı.
Bul joybar sheńberinde shólkemlestirilip atırǵan oqıw-seminarlar jaslardı fermerlikke qızıqtırıw, olardıń isbilermenlik potencialın rawajlandırıw hám awıl xojalıǵında nátiyjeli jumıs alıp barıwı ushın zárúr bolǵan ámeliy bilimlerdi qáliplestiriwge xızmet etpekte. Intensiv baǵdarlama dawamında qatnasıwshılarǵa bazar talabına say ónimler jetistiriw, jer resurslarınan aqılǵa uǵras paydalanıw, agrotexnikalıq ilajlardı durıs shólkemlestiriw, ónimlerdi saqlaw hám qayta islew, marketing hám satıw strategiyaları boyınsha túsinikler berildi.
Ilajda Aralboyı xalıqaralıq innovaciya orayınıń innovaciya bólimi baslıǵı Sharapat Xojanazarov qatnasıp, oraydıń jumısı hám bul jerde ámelge asırılıp atırǵan ilimiy-izertlew jumısları haqqında hár tárepleme maǵlıwmat berdi. Sonday-aq, fermerlik jumısın baslaw niyetinde bolǵan jaslarǵa topıraqtıń quramı hám sapasına qarap egin túrlerin tańlaw, suwdı únemleytuǵın suwǵarıw texnologiyaların qollanıw, ósimliklerdi tárbiyalaw, zıyankesler hám keselliklerge qarsı gúresiw, ónimdarlıqtı arttırıwdıń zamanagóy usılları, qıytaq jer, baǵshılıq hám balıqshılıq tarawları boyınsha ámeliy usınıslar berildi.
Seminardıń itibarlı táreplerinen biri sonda, teoriyalıq bilimler ámeliy mısallar menen bekkemlendi. Jaslar innovaciyalıq ıssıxanalar, nál jetistiriw maydanları hám tájiriybe uchastkaları menen tanısıp, joqarı ónimdarlıqqa erisiwde innovaciyalardıń áhmiyetin jaqınnan kórdi. Qánigeler tárepinen sanlı texnologiyalardan paydalanıw, klimat ózgerislerine beyimlesken awıl xojalıǵı usılları hám eksportqa jaramlı ónimler jetistiriw boyınsha da qızıqlı maǵlıwmatlar usınıldı.
– Men eki jıldan berli Shomanay rayonında úyimiz janındaǵı 6 sotıx jer maydanında baǵshılıq penen shuǵıllanıp kelemen. Búgingi seminar dawamında baǵımdı bunnan bılay da rawajlandırıw, ónimlerdiń sapasın hám zúráátliligin arttırıw boyınsha kóplegen jańa maǵlıwmatlarǵa iye boldım. Ásirese, topıraq analizi tiykarında tóginlew, tamshılatıp suwǵarıw texnologiyaları hám miywe tereklerin durıs tárbiyalaw boyınsha berilgen usınıslar men ushın oǵada paydalı boldı. Alǵan bilimlerimdi ámeliyatqa qollanıp, baǵshılıq jumısımdı jáne de keńeytiwdi maqset etkenmen, – deydi ilaj qatnasıwshısı, student Feruza Userbaeva.
“Jas fermerler mektebi” joybarı awıl xojalıǵı tarawında bilimli, intaker hám zamanagóy pikirleytuǵın jaslar qatlamın qáliplestiriwge xızmet etip atırǵanın atap ótiw kerek. Bunday ámeliy seminarlar arqalı jaslar tek ǵana tarawǵa baylanıslı bilimlerin bayıtıp qoymastan, al keleshekte óz fermerlik jumısın jolǵa qoyıw, jańa jumıs orınların jaratıw hám mámleketimiz azıq-awqat qáwipsizligin támiyinlewge úles qosıw múmkinshiligine iye bolmaqta. Usı jaǵınan bul ilaj jaslardı qollap-quwatlaw hám olardıń bántligin támiyinlewge qaratılǵan áhmiyetli baslamalardan biri sıpatında ayrıqsha áhmiyetke iye.
Qaraqalpaqstan xabar agentligi