Elimizde naq pulsız esap-sanaqlardı keńeytiw, sawda hám xızmet kórsetiw tarawında zamanagóy tólem sheshimlerin engiziw jáne isbilermenlik subektleriniń qárejetlerin qısqartıw maqsetinde Birden-bir milliy QR-kod sisteması – UzQR basqıshpa-basqısh iske qosılmaqta.
Oraylıq banktiń málim etiwinshe, bul sistemanıń tiykarǵı abzallıǵı sonda, tutınıwshı qaysı bank yamasa tólem shólkeminiń mobil qosımshasınan paydalanıwına qaramastan, birden-bir QR-kodtı skanerlew arqalı tólemdi ámelge asıra aladı. Bul bolsa sawda hám xızmet kórsetiw subektlerin hár qıylı QR-kodlar hám óz aldına tólem sheshimlerin saqlap turıw zárúrliginen azat etedi.
Atap ótiliwinshe, UzQR mámlekette birden-bir tólem ortalıǵın qáliplestiriw, básekini kúsheytiw hám xalıq ushın jáne de qolaylı xızmetlerdi jaratıwǵa mólsherlengen.
Sistema arqalı ámelge asırılatuǵın tólemler boyınsha ulıwma komissiya muǵdarı 0,65 procent etip belgilengen. Áhmiyetlisi, bul qarjı tólem shınjırında qatnasıwshı barlıq subektler arasında ashıq-aydın tárizde hám olardıń haqıyqıy wazıypası jáne qárejetlerine sáykes túrde bólistiriledi.
Komissiya tómendegishe bólistiriledi: 0,10 procenti – ekvayer bank (QR-kodın isbilermenge ornatıp bergen bank), 0,15 procenti – tólem Uzcard yamasa Humo milliy kartaları arqalı ámelge asırılǵanda tiyisli úles, 0,20 procenti – QR-kod operatorı (sistemanı texnikalıq qollap-quwatlaw, birden-bir call-oray, jeke kabinetler hám onlayn-KSM integraciyası qárejetleri ushın), 0,05 procenti – karta emitenti, 0,15 procenti – tólem intakeri, yaǵnıy QR-kodtı oqıwshı mobil qosımsha, 0,05 procenti – tólewshi bankke bólistiriledi.
Tarif sistemasınıń ózine tán tárepi sonda, ayırım qatnasıwshılar bir waqıttıń ózinde bir neshe úlesti alıwı múmkin. Máselen, tólem banktiń óziniń mobil qosımshası arqalı ámelge asırılsa hám karta da usı bank tárepinen shıǵarılǵan bolsa, banktiń ulıwma úlesi 0,20 procentke jetedi. Eger sawda subekti de usı banktiń qarıydarı bolsa, bul kórsetkish 0,30 procentke shekem artıwı múmkin.
Oraylıq bank maǵlıwmatlarına bola, búgingi kúnde mámlekette QR -kod arqalı tólemlerdi qabıl etiw boyınsha ámeldegi xızmet tarifleri ádette 1 procentten 3 procentke shekemdi quraydı.
Usı kózqarastan qaraǵanda, UzQR sistemasında belgilengen 0,65 procentlik tarif bazardaǵı ortasha tariflerge salıstırǵanda sezilerli dárejede tómen bolıp esaplanadı.
Jáne bir áhmiyetli tárepi sonda, Uzcard hám Humo milliy tólem sistemalarınıń basqa, milliy bolmaǵan QR -kod sheshimleri ushın qollanılatuǵın tarifleri 0,3-0,37 procent átirapında bolsa, UzQR ulıwma milliy áhmiyetke iye joybar sıpatında bahalanǵanı ushın bul úles 0,10 procentke shekem tómenletilgen.
Sistemanıń rásmiy tarif siyasatında eń áhmiyetli principlerden biri – tólewshi, yaǵnıy tutınıwshıdan hesh qanday komissiya óndirilmewi. Belgilengen 0,65 procentlik tarif tek ǵana sawda hám xızmet kórsetiw subektleri tárepinen tólenedi hám ol tólem infrastrukturasında qatnasıwshı shólkemler arasında bólistiriledi.
Sonıń menen birge, ayırım jaǵdaylarda tutınıwshıdan qosımsha jıyım alınıp atırǵanı baqlanbaqta. Qánigeler bul jaǵdaylar UzQR rásmiy tarifiniń quramına kirmeytuǵının, al ayırım qatnasıwshılardıń erkin baslaması tiykarında engizilgen qosımsha ústemeler ekenin atap ótpekte. Házirgi waqıtta bul másele tártipke salıw procesinde kórip shıǵılmaqta.
Atap ótiliwinshe, UzQR sisteması arqalı jaratılǵan birden-bir standart sawda orınları ushın qárejetlerdi azaytadı, tólem xızmetleri bazarında básekini kúsheytedi hám milliy tólem infrastrukturasınıń turaqlı rawajlanıwına xızmet etedi.
Eń áhmiyetlisi, sistemadaǵı hár bir qatnasıwshınıń úlesi onıń real wazıypası hám qárejetlerine muwapıq belgilengen bolıp, bul ashıq-aydınlıqtı támiyinleydi. Nátiyjede hám isbilermenler, hám tutınıwshılardıń mápleri qorǵaladı, mámlekette sanlı ekonomikanı rawajlandırıw ushın jáne bir áhmiyetli qádem qoyıladı.
ÓzA