Búgin elimizdegi barlıq futbol jankúyerleriniń dıqqatı AQShtıń Texas shtatı Xyuston qalasındaǵı «NRG» (NRG Stadium) stadionǵa qaratıladı. Sebebi, bul jerde óz tariyxında tuńǵısh márte futbol boyınsha jáhán chempionatına qatnasıp atırǵan Ózbekstan saylandı komandası chempionat jeńimpazlıǵına tiykarǵı dawagerlerdiń biri Portugaliya saylandı komandasına qarsı oyınǵa túsedi.
Eń bir áhmiyetli tárepi sonda, bul oyında qaraqalpaqstanlı oqıwshı Jáhangir Sadikov Ózbekstan-Portugaliya ushırasıwında toptı stadionǵa alıp shıǵadı.
Bul álbette, respublikamız turǵınlarında úlken maqtanısh sezimin oyatadı dep oylaymız. Maǵlıwmat ushın aytıp ótiwimiz kerek, «Kia» kompaniyası tárepinen jáhán chempionatı sheńberinde járiyalanǵan «Eń jaqsı videorolik» tańlawında Nókis qalasındaǵı 46-sanlı ulıwma orta bilim beriw mektebiniń 6-klass oqıwshısı Jáhangir Sadikov jeńimpaz dep tabılǵan hám usı joqarı nátiyje esabınan Jahangir 23-iyun kúni bolıp ótetuǵın Ózbekstan – Portugaliya arasındaǵı tariyxıy ushırasıwda toptı stadionǵa alıp shıǵıw imkaniyatına iye bolǵan edi.
Qaraqalpaqstan xabar agentligi