AQSh, Meksika hám Kanada maydanlarında ótkerilip atırǵan futbol boyınsha jáhán chempionatında házirgi waqıtta 2-tur oyınları bolıp ótpekte.
Keshe bolıp ótken Argentina hám Avstriya saylandı komandaları arasındaǵı oyında jáhán chempionatlarında gol urıw boyınsha 2014-jılı germaniyalı Miroslav Kloze tárepinen ornatılǵan dúnya rekordı jańalandı.
Atap aytqanda, óziniń shıraylı oyınları hám golları menen búgingi kúndegi tek ǵana Argentina emes, al dúnya futbol ápsanalarınıń biri bolǵan Lionel Messi Avstriyaǵa qarsı ushırasıwda dublge erisip, óziniń jáhán chempionatlarında urǵan golları sanın 18 ge jetkerdi. Solay etip, oǵada qızıqlı ótken ushırasıw Argentina saylandı komandasınıń 2:0 esabındaǵı jeńisi menen tamamlandı.
Al, usı topardaǵı Iordaniya hám Aljir saylandı komandaları arasındaǵı oyında bolsa, 1:2 esabında afrikalı futbolshılar jeńiske eristi.
«J» toparında oyın kórsetip atırǵan Franciya bolsa, bul turda Iraktı 3:0, Norvegiya Senegaldı 3:2 esabında jeńip shıǵıp, jáhán chempionatınıń kelesi basqıshına jollamanı qolǵa kirgizdi.
Áhmiyetli tárepi sonda, bul oyınlardı franciyalı Kilian Mbappe jáne dublge erisip, óziniń jáhán chempionatlarındaǵı gollar sanın 16 ǵa jetkerdi hám Messidiń izinen quwıwdı dawam etpekte.
Sonday-aq, bul turda norvegiyalı jáne bir futbol juldızı Erling Xolland 2 gol urıp óz komandasınıń jeńiske erisiwin támiyinledi. Bul Xollandtıń jáhán chempionatındaǵı 2-oyında urǵan 4-golı bolıp esaplanadı.
Búgin saat 22:00 de bolsa, Ózbekstan saylandı komandası Ronaldu jetekshiligindegi Portugaliyaǵa qarsı oyınǵa túsedi.
Adilbay Orazov,
Qaraqalpaqstan xabar agentligi sholıwshısı