Oraylıq bank 2026-jıldıń birinshi shereginiń juwmaqları boyınsha xalıq hám isbilermenlerdiń múrájatları menen islesiw nátiyjeliligi boyınsha tallaw nátiyjelerin járiyaladı. Onda qarıydarlardıń shaǵımları sanı, olardı kórip shıǵıw sapası hám múrájatlarǵa múnásibet dárejesi tiykarında banklerdiń jumısı bahalanǵan.
Atap ótiliwinshe, tutınıwshılardıń huqıqların qorǵaw hám bank xızmetleriniń sapasın arttırıw maqsetinde Oraylıq bank hám basqa da mámleketlik uyımlarǵa kelip túsip atırǵan múrájatlar turaqlı tallanıp barıladı. Mine, usı tallawlar tiykarında qáliplestirilgen reytingte ayırım kommerciyalıq banklerde múrájatlar menen islesiw sisteması jeterli dárejede nátiyjeli emesligi anıqlanǵan.
2026-jıldıń birinshi shereginiń juwmaqlarına bola, múrájatlar menen islesiw boyınsha eń unamsız kórsetkish belgilengen bankler diziminde birinshi orındı “Biznesti rawajlandırıw banki” iyeledi. Keyingi orınlardan “Anorbank” hám “Mikrokreditbank” orın alǵan.
Sonday-aq, «AVO bank» jáne «TBC bank» ta klientlerdiń múrájatları boyınsha unamsız kórsetkishke iye bankler qatarına kirgizilip, reytingtiń tórtinshi hám besinshi tekshelerinen orın aldı.
Oraylıq banktiń atap ótiwinshe, bul banklerde tiykarınan tómendegi mashqalalar baqlanbaqta. Atap aytqanda, bank ónimleri hám xızmetleri boyınsha qarıydarlarǵa tolıq hám anıq maǵlıwmat berilmewi, múrájatlarǵa óz waqtında hám sapalı juwap berilmewi sıyaqlı mashqalalar baqlanǵan. Sonday-aq, qayta-qayta shaǵımlarǵa sebep bolıp atırǵan sistemalı kemshiliklerdiń saplastırılmay atırǵanı, aralıqtan xızmetler, tólem operaciyaları hám kreditler menen baylanıslı mashqalalardıń keshiktirip sheshilip atırǵanı, tutınıwshılardıń huqıqların qorǵaw boyınsha ishki qadaǵalaw mexanizmleriniń jeterli dárejede islemey atırǵanı sıyaqlı mashqalalar baqlanbaqta.
Bank sistemasına bolǵan isenimdi bekkemlewde tek ǵana finanslıq turaqlılıq emes, al, qarıydarlar menen ashıq-aydın hám nátiyjeli qarım-qatnas ta úlken áhmiyetke iye. Sol sebepli múrájatlardı jedel hám sapalı kórip shıǵıw, payda bolıp atırǵan mashqalalardı sistemalı sheshiw hár bir bank jumsınıń áhmiyetli baǵdarlarınan biri bolıp qalmaqta.
Oraylıq bank bolsa bank xızmetleriniń sapası hám tutınıwshılardıń huqıqların qorǵaw boyınsha monitoring jumısların izbe-iz dawam ettiretuǵının málim etti.
Sh.Mamaturopova, ÓzA