Balalıqtan sportqa mehir qoyǵanman. Erkin gúres penen shuǵıllanaman. Bul sport túri maǵan óziniń jedelligi, isenim talap etiwi hám insan xarakterin shınıqtırıwı menen unaydı. Waqıttıń ótiwi menen mine usı qızıǵıwshılıq maqsetke, maqset bolsa ómir jolıma aylandı.
Búgingi kúnde sport tarawına itibar, zamanagóy sport obektleri, maman trenerlerdiń jumısı, jas talantlılardı qollap-quwatlawǵa qaratılǵan sistemalı jumıslar kóplegen jigit-qızlardıń úlken sportqa kirip keliwine xızmet etpekte. Men de mine usı imkaniyatlardan nátiyjeli paydalanǵan jaslar qatarındaman. Ásirese, Qaraqalpaqstanda sporttı rawajlandırıw, jaslardı salamat turmıs tárizine tartıw, qızlardıń sport penen shuǵıllanıwına járdemlesiw jolındaǵı jumıslar jańa áwlad sportshılarınıń kamalǵa keliwine bekkem tiykar jaratpaqta. Xalıqaralıq maydanlarda elimizdiń abırayın qorǵap atırǵan kóplegen sportshılar qatarında men de jaratılǵan sharayat hám berilgen isenimniń nátiyjesin óz jumısım mısalında tereń sezemen.
2013-jılı erkin gúres boyınsha Ózbekstan saylandı komandası qatarına qabıllandım. Bul men ushın úlken isenim hám sonıń menen birge úlken juwapkershilik edi. Endi men tek ózim emes, al pútkil mámleketimiz atınan gilemge shıqtım. Usı dáwirden baslap xalıqaralıq jarıslarǵa jol ashıldı. Aldımızda bolsa óz kúshimdi jáhán kólemindegi abıraylı bellesiwlerde sınaqtan ótkeriw, Ózbekstan bayraǵın xalıqaralıq arenalarda múnásip qorǵawday juwapkershilikli wazıypalar kútip turǵan edi. Mine, usı jarıslar sporttaǵı háreketlerimniń gezektegi, jáne de áhmiyetli basqıshı boldı.
Xalıqaralıq maydandaǵı dáslepki jetiskenliklerim 2014-jılǵa tuwra keledi. Sol jılı Tailandtıń CHonburi qalasında ótkerilgen erkin gúres boyınsha Aziya chempionatında 3-orındı iyeledim. Sonday-aq, 2015-jılı Hindstannıń Nyu-Deli qalasında ótkerilgen Aziya chempionatında da sıylı orınǵa miyasar boldım. Eń áhmiyetlisi, bul jetiskenlikler jáne de úlken maqsetlerge qaray umtılıwım ushın kúsh hám xoshamet berdi.
Keyingi jılları trenerlerimniń sabaqları hám shınıǵıwlarda arttırǵan tájiriybem nátiyjelerde sáwlelene basladı. 2016-jılı Qazaqstannıń Shımkent qalasında ótkerilgen xalıqaralıq jarısta 1-orındı iyelew nesip etti. Bul jeńis jumısımdaǵı áhmiyetli basqıshlardan biri boldı. Sol jılı Filippinniń Manila qalasında ótken Aziya chempionatında, Tayvannıń Taychung qalasındaǵı Aziya chempionatında da 3-orındı qolǵa kirgizdim.
Bunnan tısqarı, jumısımdaǵı áhmiyetli jetiskenliklerden biri sıpatında 2011-2018-jıllar dawamında erkin gúres boyınsha on márte Ózbekstan chempionı bolǵanımdı ayrıqsha atap ótiwim múmkin.
Jıllar dawamında xalıqaralıq maydanlarda arttırǵan tájiriybem meni jáne de úlken jarıslarǵa jetekledi. Jumısımdaǵı eń este qalarlıq jarıslardan biri 2023-jılı Qıtaydıń Guanchjou qalasında ótkerilgen 19-Aziya oyınları boldı. Bul abıraylı jarısta 3-orındı iyelewim men ushın umıtılmas waqıya boldı. Aldımızda bolsa hár bir sportshı árman etetuǵın eń iri jarıs – Olimpiada oyınları turar edi. Bul joldıń qanshelli qıyın ekenligin jaqsı biler edim. Olimpiada jollamasın qolǵa kirgiziw ushın tek ǵana sheberlik emes, al bekkem erk-ıqrar, ruwxıy turaqlılıq hám óz kúshine bolǵan isenim de zárúr edi.
2024-jılı Qırǵızstannıń Bishkek qalasında Olimpiada oyınlarına jollama beriwshi jarıs bolıp ótti. Mine, usı bellesiwlerde Ózbekstan tariyxında hayal-qızlar gúresi boyınsha dáslepki Olimpiada jollamasın qolǵa kirgiziwge eristim. Usılayınsha Parijde bolıp ótken Olimpiada oyınlarınıń qatnasıwshısına aylandım. Hár bir sportshı ushın Olimpiada maydanına shıǵıw úlken maqtanısh esaplanadı. Men de bul imkaniyattı watanım atınan xalıqaralıq sport tariyxınıń eń abıraylı saxnasında qatnasıw baxtı sıpatında qabıl ettim. Aldında bolsa jańa maqsetler, sınaqlar kóp. Sol sebepli búgingi jetiskenlikler menen sheklenip qalmastan, ózim ústinde islewdi dawam ettirip, elimizdiń dańqın dúnyaǵa tanıtıw jolında bar kúsh hám imkaniyatlarımdı jumsawǵa umtılaman.
Men ushın sport ózim tuwılıp ósken elge bolǵan húrmetti ámelde kórsetiw imkaniyatı bolıp tabıladı. Qaraqalpaqstannıń alıs aymaqlarında sportqa qızıǵıp, úlken arzıwlar menen jasap atırǵan qızlar barlıǵın bilemen. Múmkin olardan birewi búgin birinshi shınıǵıwına qatnasıp atırǵan shıǵar, birewi birinshi jarısına tayarlıq kórip atırǵan shıǵar. Jıllar ótip, olardıń arasınan jańa chempionlar jetisip shıǵatuǵınına isenemen. Bul ushın búgin hár qashanǵıdan da kóbirek imkaniyatlar bar. Men bolsa olarǵa ilham hám isenim berip, haqıyqıy úlgi bolıwım kerek hám usı jolda tınımsız háreket etpektemen.
Aytqanımday, ele maqsetlerim kóp. Maqset penen jasaytuǵın insan bolsa jańa sheklerge qaray háreket etiwde dawam ete beredi. Men de áne usı háreketten kúsh alıp, Ózbekstan bayraǵın dúnya arenalarında bárqulla bálent kóteriw, ana xalqımızdıń biz, jaslarǵa isenimin aqlaw jolında umtılıwdan toqtamayman. Sebebi eldiń atı jańlaǵan gezlerde sportshınıń jeke quwanıshı artıńızda turǵan ullı bir xalıqtıń maqtanısh sezimi menen aralasıp ketedi. Mine usınday máwritler bolsa hár qanday sıylıqtan da qádirli.

Aqteńge KEUNIMJAEVA,
erkin gúres boyınsha xalıqaralıq sport ustası,
erkin gúres boyınsha Ózbekstan saylandı komandasınıń aǵzası