Múnásibet
Elimizde xalıqtıń sud qorǵawında bolıw kepilliklerin jáne de kúsheytiwdiń, sudlarda korrupciyalıq qáwip-qáterlerdi anıqlaw hám bahalawdıń professional sisteması engizilmekte.
Prezidentimiz tárepinen usı jıl 9-iyun kúni “Sudlarda komplaens qadaǵalaw sistemasınıń nátiyjeliligin arttırıwdıń qosımsha ilajları haqqında”ǵı pármanǵa qol qoyıldı.
Bul hújjet sud sistemasında 2026-jılı korrupciyaǵa qarsı gúresiw boyınsha járiyalanǵan “ayrıqsha jaǵday” sheńberinde belgilengen wazıypalardı nátiyjeli ámelge asırıw, taraw jumısınıń ashıq-aydınlıǵın támiyinlew jáne xalıqtıń sudlarǵa bolǵan isenimin bekkemlewge xızmet etedi.
Párman menen sud sistemasında korrupciyanıń aldın alıw boyınsha pútkilley jańa qatnaslar engizilmekte. Atap aytqanda, Joqarǵı sud sistemasında Komplaens qadaǵalaw xızmeti shólkemlestirilip, ol sud apparatınıń jumısında korrupciyalıq qáwip-qáterlerdi anıqlaw hám bahalaw, mápler soqlıǵısıwın saplastırıw, xızmetkerler tárepinen nızamshılıq hám kásiplik etika talaplarına ámel etiliwin qadaǵalaw sıyaqlı wazıypalardı ámelge asıradı.
Sonday-aq, Qaraqalpaqstan Respublikası sudı, áskeriy sudlar, wálayatlar hám Tashkent qalalıq sudlarında komplaens qadaǵalaw boyınsha inspektor lawazımları engiziledi. Bul bolsa korrupciyanıń aldın alıw sistemasın aymaqlarda da nátiyjeli shólkemlestiriw imkaniyatın beredi.
Bizge belgili, hár qanday tarawdıń rawajlanıwı jetik qánigelerdiń qatnasıwı menen támiyinlenedi. Usı jaǵınan pármanda kadrlar siyasatına da ayrıqsha itibar qaratılǵan, yaǵnıy sud apparatına jumısqa qabıl etiw processleri ashıq tańlaw tiykarında shólkemlestiriliwi názerde tutılǵan. Talabanlardıń kásiplik bilim hám kónlikpeleri, ruwxıy-ádep-ikramlılıq pazıyletleri, hadallıǵı hám jámáátte islesiw qábileti zamanagóy bahalaw usılları arqalı anıqlanadı.
Bunıń ushın 2026-jıldıń aqırına shekem vakant lawazımlardı járiyalaw hám talabanlardı tańlap alıwǵa mólsherlengen “vacancy.sud.uz” portalı jáne insan resursların basqarıwǵa qánigelestirilgen “SudHR” elektron platforması iske qosıladı. Olarda jasalma intellekt texnologiyalarınan da paydalanıw názerde tutılǵan.
Hújjet penen sud apparatı xızmetkerleri hám sudyalar jumısında mápler soqlıǵısıwınıń aldın alıwǵa qaratılǵan elektron deklaraciyalaw sistemaları da basqıshpa-basqısh engiziledi. Bul sistemalar arqalı dáramatlar, múlk hám basqa da áhmiyetli maǵlıwmatlardı usınıw jáne tallaw processleri avtomatlastırıladı.
Pármanda korrupciyaǵa qarsı profilaktikalıq ilajlardı kúsheytiwge tiykarǵı áhmiyet berilgeni sudyalar hám sud apparatı xızmetkerleriniń bul illetke qarsı turaqlılıq dárejesin bahalaw, olar ushın “real keysler” tiykarında oqıw modullerin shólkemlestiriw hám hár úsh jılda qánigeligin arttırıw kurslarınan ótiw sharayatın názerde tutadı.
Usı jerde sud islerin avtomatikalıq bólistiriw baǵdarlamasın jetilistiriw de áhmiyetli wazıypalardan biri sıpatında belgilendi. Bul – tarawdaǵı jumıslardı bólistiriw procesiniń jáne de ashıq-aydın bolıwın támiyinlep, insan faktorınıń tásirin azaytıwǵa xızmet etedi.
Juwmaqlap aytqanda, bul párman sud sistemasında korrupciyaǵa qarsı gúresiwdiń institucionallıq tiykarların jáne de bekkemleydi, kadrlar siyasatında ádillik hám meritokratiya principlerin keńnen engiziwge xızmet etedi. Eń áhmiyetlisi, xalıqtıń ádil sudlawǵa bolǵan isenimi hám sud qorǵawı kepilliklerin jáne de kúsheytiw ushın bekkem tiykar jaratadı.
ÓzA