Ózbekstan Respublikası Prezidenti Shavkat Mirziyoevtiń mirát etiwine bola 17-18-iyun kúnleri Germaniya Federativlik Respublikası Prezidenti Frank-Valter Shtaynmayer ómirlik joldası menen birgelikte rásmiy sapar menen elimizde boldı.
Eki kúnlik sapar baǵdarlaması mazmunlı bolǵanın atap ótiw kerek. Sapardıń birinshi kúni Ózbekstan hám Germaniya mámleket basshılarınıń tar sheńberde hám rásmiy delegaciyalardıń qatnasıwında sóylesiwleri bolıp ótti. Bir qatar jańa birgeliktegi joybarlar hám baǵdarlamalar iske qosıldı.
Mámleketler basshıları ótkerilgen sóylesiwlerdiń juwmaqları boyınsha Birgeliktegi bildiriw qabıl etip, kóp qırlı birge islesiwdi bunnan bılay da bekkemlewge umtılatuǵının tastıyıqladı. Eki tárepleme hújjetlerdi almasıw máresimi de bolıp ótti. Ózbekstanda qalalardı turaqlı rawajlandırıw boyınsha joybarlardı ámelge asırıw ushın grant qarjıların ajıratıw hám jeńilletilgen qarjılandırıwdı názerde tutatuǵın finanslıq birge islesiw tarawındaǵı kelisimlerge qol qoyıldı.
Joqarı mártebeli miyman 18-iyun kúni Tashkenttegi Islam civilizaciyası orayına bardı.
Islam civilizaciyası orayı tariyxıy hám zamanagóy ilimdi úylestirgen, qoljazba dereklerdi sanlı texnologiyalar tiykarında úyreniwge xızmet etetuǵın iri xalıqaralıq ilimiy-mádeniy kompleks bolıp esaplanadı.
Milliy arxitekturalıq dástúrler hám zamanagóy dizayn kózqaraslarınıń úylesimliliginde qurılǵan oraydıń gúmbezleri, portalları hám názik naǵıslı bezewleri onıń biytákirar arxitekturalıq kórinisin kórsetedi.
Joqarı mártebeli miymanǵa xalqımızdıń tariyxıy rawajlanıwınıń áhmiyetli basqıshların sáwlelendiretuǵın “Islamǵa shekemgi civilizaciyalar,” “Birinshi Renessans dáwiri,” “Ekinshi Renessans dáwiri,” “Ózbekstan XX ásirde” hám “Jańa Ózbekstan – Jańa Renessans” bólimleri tolıq tanıstırıldı. Bul ekspoziciyalarda bul dáwirlerdiń tariyxı biybaha zatlar, qoljazba derekler, fotomateriallar hám zamanagóy multimedia quralları arqalı sáwlelendirilgen.
Delegaciya wákilleri Quranı kárim zalında bolıp, islam dúnyasınıń eń siyrek ushırasatuǵın estelikleriniń biri bolǵan áyyemgi Usman Mushafi menen tanıstı. Bul biybaha derek óziniń úlken tariyxıy hám mádeniy áhmiyeti menen keliwshilerde úlken tásir qaldıradı.
Germaniya Federativlik Respublikası Prezidenti Frank-Valter Shtaynmayer mámleketleraralıq mádeniy qarım-qatnas hám ruwxıy jaqınlıqtı bekkemlep, globallıq sharayatta xalıqaralıq birge islesiwdi kúsheytiwde Islam civilizaciyası orayınıń ornı sheksiz ekenin atap ótti.
Sońǵı jıllarda Ózbekstan hám Germaniya Federativlik Respublikası arasındaǵı kóp qırlı qatnasıqlar pútkilley jańa basqıshqa kóterildi. Turaqlılıqqa iye joqarı dárejedegi sóylesiwler eki tárepleme ekonomikalıq sheriklikke jańa pát baǵıshlamaqta.
Búgin Ózbekstan hám Germaniya ekonomikaları bir-birin tolıqtıratuǵın ózgeshelikke iye ekeni ámeliy joybarlarda ayqın kózge taslanbaqta. Germaniya óziniń aldınǵı texnologiyaları hám joqarı sapalı sanaat úskeneleri menen elimiz ushın eń isenimli sheriklerden birine aylandı. Elimizde nemis kapitalı hám joqarı texnologiyalarınıń qatnasıwında ámelge asırılıp atırǵan iri baslamalar ekonomika tarmaqların modernizaciyalawǵa xızmet etpekte.
Tashkent qalasında tabıslı jumıs alıp barıp atırǵan “Papenburg Uzbekistan” birgeliktegi kárxanası mine usınday joqarı texnologiyalıq birge islesiwdiń ayqın úlgisi bolıp esaplanadı.
Germaniya Federativlik Respublikası Prezidenti Frank-Valter Shtaynmayer bul birgeliktegi kárxanada da boldı.
Germaniyanıń jetekshi texnologiyaları hám milliy jol qurılısı dástúrleri tiykarında shólkemlestirilgen bul kárxana infrastrukturalıq rawajlanıw baǵdarında nátiyjeli jumıs alıp barmaqta. Eki mámleket basshılarınıń áhmiyetli kelisimleri hám Ózbekstan Húkimetiniń tiyisli qararınıń orınlanıwı sheńberinde 2021-jılı jumıs baslaǵan bul subekt qısqa múddette milliy jol infrastrukturasın xalıqaralıq standartlar dárejesinde jańalawdıń áhmiyetli drayverlerinen birine aylandı.
Joybardı keń kólemde ámelge asırıw, zamanagóy óndiristi jolǵa qoyıw maqsetinde paytaxtımızdıń Bektemir rayonınan 8 gektardan aslam jer maydanı ajıratılǵan. Kárxananıń qısqa waqıtta tolıq quwatlılıq penen iske túsiriliwi hám joqarı nátiyjelilikke erisiwinde Ózbekstandaǵı qolaylı isbilermenlik ortalıǵı, byurokratiyalıq tosqınlıqlardıń joq ekenligi jáne nızamshılıq dárejesindegi kepillikler áhmiyetli tiykar boldı.
Bul joybar tek ǵana ekonomikalıq emes, al úlken sociallıq áhmiyetke iye. Búgingi kúnde kárxanada jumıs alıp barıp atırǵan joqarı mamanlıqtaǵı jumısshı hám qánigelerdiń tiykarǵı bólegin jergilikli jaslar quraydı. Olar nemis injenerlerinen zamanagóy texnologiyalardı basqarıw sırların úyrenip, elimizde jol qurılısı tarawınıń jańa áwlad kadrları bolıp jetilisip shıqpaqta.
Eki tárepleme sheriklik kóleminiń bunday keńeyiwi tek ǵana sanaat hám infrastruktura emes, al miynet migraciyası hám professional bilimlendiriw baǵdarında da jańa perspektivalardı ashpaqta. Sonlıqtan, sapar dawamında Germaniya Prezidenti Frank-Valter Shtaynmayerge Ózbekstan Respublikası Ministrler Kabineti janındaǵı Migraciya agentligi hám Germaniyanıń juwapker shólkemleri menen birgelikte ámelge asırılıp atırǵan maqsetli joybarlar haqqında maǵlıwmat berildi. Bul processte jaslardı jumıs penen támiyinlew hám olardıń kásiplik sheberligin arttırıw máselesine ayrıqsha itibar berildi.
Bul joybarlar ózbekstanlı jaslarǵa nemis tili hám xalıqaralıq kásiplik standartlardı puqta úyretiw arqalı olardıń Germaniyadaǵı jetekshi sanaat, qurılıs, medicina, transport hám xızmet kórsetiw tarmaqlarında nızamlı jáne qáwipsiz miynet etiwin jolǵa qoyıwǵa qaratılǵan. Bul bolsa elimizde jaslardıń bántligin támiyinlew hám olardıń jáhán miynet bazarında básekige shıdamlılıǵın arttırıwda áhmiyetli faktor bolmaqta.
Joqarı mártebeli miyman eki mámleket arasındaǵı miynet migraciyası tarawındaǵı sistemalı baslamalar hám jaslardı qollap-quwatlaw baǵdarlamalarına ayrıqsha qızıǵıwshılıq bildirdi.
Búgingi kúnde Germaniyanıń 38 iri sherik-jumıs beriwshi shólkemi menen tikkeley izbe-iz baylanıslar ornatılǵan. Áyne usı birge islesiw nátiyjesinde Germaniya miynet bazarında ózbekstanlı qánigeler ushın 73 mıńnan aslam bos jumıs ornı usınıs etilgen bolıp, házirgi kúnge shekem bul baǵdarda 5 mıń 500 puqara germaniyalı jumıs beriwshilerge biriktirildi.
Sapar sheńberinde ásirese medicina hám densawlıqtı saqlaw baǵdarındaǵı birgeliktegi joybarlar ayrıqsha atap ótildi.
Germaniya Prezidenti nemis tili hám kásip-óner sırların úyrenip, Germaniyaǵa jumısqa ketiwge tayarlıq kórip atırǵan ózbekstanlı jaslar menen qızǵın sóylesti. Jaslardıń bilimge bolǵan umtılısı hám nemis tilin jetik iyelegeni joqarı bahalandı.
Usınıń menen Germaniya Federativlik Respublikası Prezidenti Frank-Valter Shtaynmayerdiń Ózbekstanǵa saparı juwmaqlandı.
ÓzA