Ózbekstan Respublikası Prezidenti Shavkat Mirziyoev besinshi Tashkent xalıqaralıq investiciya forumı sheńberinde Qazaqstan Respublikasınıń Bas ministri Oljas Bektenov, Birlesken Arab Ámirlikleri energetika hám infrastruktura ministri Suhayl al-Mazruiy basshılıǵındaǵı delegaciya, Qıtay Xalıq Respublikası Milliy energetika basqarmasınıń basshısı Van Xunchji basshılıǵındaǵı usı mámlekettiń jetekshi kompaniyaları hám finans institutlarınıń delegaciyası, Ullı Britaniyanıń investiciyalar boyınsha mámleketlik ministri, lord Djeyson Stokvud basshılıǵındaǵı delegaciya hám Ózbekstan – Saudiya Isbilermenler keńesiniń járdemshi baslıǵı, “ACWA” kompaniyasınıń basqarma baslıǵı Muhammad Abunayyandı qabılladı.
Qazaqstan Respublikası Bas ministri Oljas Bektenov sóylesiw aldınan mámleketimiz basshısına Qazaqstan Respublikası Prezidenti Qasım-Jomart Toqaevtıń qızǵın sálemin hám jaqsı tileklerin jetkerdi.
Ózbekstan – Qazaqstan strategiyalıq sheriklik hám awqamlaslıq qatnasıqların jáne de tereńlestiriwdiń áhmiyetli máseleleri kórip shıǵıldı.
Barlıq dárejelerdegi jedel sóylesiw qanaatlanıwshılıq penen atap ótildi. Tovar almasıw kólemleri ósip, jaqında qabıl etilgen jańa “jol kartası” tiykarında ekonomikanıń tiykarǵı tarmaqlarında kooperaciya joybarların ámelge asırıw dawam etpekte.
Iyul ayında bolıp ótetuǵın Húkimetleraralıq komissiya májilisi hám Aqtaw qalasında ótkeriletuǵın aymaqlar basshılarınıń birinshi Keńesine puqta tayarlıq kóriw áhmiyetli ekenligi atap ótildi.
Birlesken Arab Ámirlikleri energetika hám infrastruktura ministri Suhayl al-Mazruiy basshılıǵındaǵı delegaciya menen ushırasıwda Ózbekstan – BAÁ strategiyalıq sheriklik qatnasıqları jedel rawajlanıp atırǵanı ayrıqsha atap ótildi.
Sóylesiw aldınan ministr mámleketimiz basshısına BAÁ Prezidenti Shayx Muhammad Ol Nahayan, Bas ministri, Dubay ámiri Shayx Muhammad Ol Maktum, Vice-prezidenti Shayx Mansur Ol Nahayan hám Abu-Dabi Ámirliginiń miyrasxorı Shayx Holid Ol Nahayannıń sálemin hám eń jaqsı tileklerin jetkerdi.
Atap ótilgenindey, tovar almasıw hám investiciyalar kólemi, birgeliktegi kárxanalardıń sanı artıp barmaqta. Besinshi Tashkent investiciyalıq forumı sheńberinde BAÁ kompaniyaları menen bir qatar jańa kelisimlerge qol qoyılıwı kútilmekte.
“Jasıl” energetika, janılǵı islep shıǵarıw, transport, logistika, jasalma intellekt, sanlastırıw hám basqa da baǵdarlardaǵı iri joybarlardı jedellestiriwge kelisip alındı.
Qıtay Xalıq Respublikası Milliy energetika basqarmasınıń basshısı Van Xunchji basshılıǵındaǵı delegaciya menen ushırasıwda “China Energy Engineering Corporation”, “China Datang”, “Sinoma Energy Conservation”, “China Southern Power Grid”, “CAMCE”, “CNNC”, “State Nuclear Uranium Resource Development” kompaniyalarınıń basshıları hám “The Export-Import Bank of China” hám “Bank of China” kompaniyalarınıń basshıları jáne “The Export-Import Bank of China” hám “Bank of China” wákilleri qatnastı.
Energetika hám geologiya tarawlarında óz-ara paydalı joqarı texnologiyalıq joybarlardı alǵa qoyıw, bank-qarjı tarawında ámeliy birge islesiwdi keńeytiw máseleleri kórip shıǵıldı.
Mámleketimiz basshısı Ózbekstan – Qıtay birge islesiwi sawda-ekonomikalıq hám investiciyalıq baǵdarlarda jedel pát penen rawajlanıp atırǵanın tereń qanaatlanıwshılıq penen atap ótti.
Jıldıń ótken dáwirinde tovar almasıwdıń kólemi 6 milliard dollardan arttı, Qıtaydan 8 milliard dollardan aslam tikkeley investiciyalar ózlestirildi. Elimizde derlik 6 mıń birgeliktegi kárxana tabıslı jumıs alıp barmaqta.
“Jasıl” energetika tarawındaǵı joybarlardı alǵa qoyıwǵa ayrıqsha itibar qaratıldı. Qıtaydıń jetekshi kompaniyalarınıń qatnasıwında Ózbekstanda quyash hám samal elektr stanciyaları jáne energiyanı saqlaw sistemaları qurılmaqta.
Bul joybarlardı jedellestiriw hám fotoelektr stanciyalarınıń quwatlılıǵın keńeytiw, agrovoltaikanı engiziw hám elektr uzatıw liniyaların qurıw sıyaqlı jańa baslamalardı baslaw rejeleri qollap-quwatlandı.
Shıǵındılardı qayta islew esabınan energiya islep shıǵarıw, data-oraylar hám basqa da zamanagóy texnologiyalıq sheshimlerdi rawajlandırıw tarawındaǵı baylanıslarǵa ayrıqsha itibar qaratıldı.
Taw-kán hám geologiya tarawlarındaǵı birge islesiw perspektivaları boyınsha pikir alısıldı. Bul baǵdarda kánlerde birgelikte geologiyalıq-izlew jumısların alıp barıw hám olardı ózlestiriw, áhmiyetli shiyki zattı jetkerip beriw tarawında uzaq múddetli sheriklikti jolǵa qoyıw názerde tutılmaqta.
Sóylesiwlerde Qıtaydıń iri bankleri menen finanslıq birge islesiwdi keńeytiwge tiykarǵı áhmiet qaratıldı. Infrastruktura joybarların qarjılandırıw, irrigaciya sistemaların modernizaciyalaw, joqarı tezlikte háreketleniwge mólsherlengen avtomobil jolları hám gidroelektr stanciyaların qurıw, awıl xojalıǵı texnikasın jetkerip beriw jáne kishi hám orta biznesti qollap-quwatlaw máseleleri dodalandı.
Ushırasıw qatnasıwshıları mámleketimiz basshısına proaktiv sóylesiw ushın minnetdarshılıq bildirip, erisilgen kelisimlerdi sózsiz ámelge asırıwǵa isenimli umtılatuǵının tastıyıqladı.
Ullı Britaniyanıń investiciyalar boyınsha mámleket ministri, lord Djeyson Stokvud basshılıǵındaǵı delegaciya menen ushırasıwda Ullı Britaniyanıń “UK Export Finance”, “Standard Chartered UK”, “Sturgeon Capital”, “Endeavour Mining” hám “British Petroleum” sıyaqlı jetekshi kompaniyaları, bankleri hám finans institutlarınıń basshıları qatnastı.
Sawda-ekonomikalıq, investiciyalıq hám finanslıq birge islesiwdi bunnan bılay da keńeytiw máseleleri kórip shıǵıldı.
Eki tárepleme birge islesiwdiń unamlı páti atap ótildi. Tovar almasıw kólemi hám Britaniya investiciyasınıń qatnasıwındaǵı kárxanalardıń sanı jedel ósip barmaqta.
Tashkent xalıqaralıq finans orayı, Xalıqaralıq kommerciyalıq sud hám kapital bazarın rawajlandırıw jáne farmacevtika, jasalma intellekt hám energetika tarawlarında texnologiyalıq sheriklikti keńeytiw boyınsha usınıslar qollap-quwatlandı.
Qarjı, infrastruktura, mámleketlik-jeke menshik sheriklik, “jasıl” energetika, transport, geologiya hám neft-gaz tarawlarında, sonıń ishinde, sociallıq infrastrukturanı rawajlandırıw hám shıǵındılardı qayta islew boyınsha birgeliktegi joybarlardı alǵa qoyıwǵa ayrıqsha itibar qaratıldı.
Ózbekstan – Saudiya Isbilermenler keńesiniń járdemshi baslıǵı, “ACWA” kompaniyasınıń basqarma baslıǵı Muhammad Abunayyan menen ushırasıwda usı mámleket isbilermenleri sheńberinde birge islesiwdi bunnan bılay da keńeytiw hám tiykarǵı joybarlardı ámelge asırıw máseleleri kórip shıǵıldı.
Saudiyanıń “ACWA” hám basqa da kompaniyaları menen nátiyjeli sheriklik jolǵa qoyılǵanı qanaatlanıwshılıq penen atap ótildi. Bul baǵdarda Tashkent investiciya forumı sheńberinde jáne bir qatar kelisimlerge erisilgen.
Ushırasıwda “jasıl” energetika, densawlıqtı saqlaw, transport, infrastruktura, turizm hám basqa da baǵdarlardaǵı joybarlardı jedellestiriwge ayrıqsha itibar qaratıldı.
ÓzA