Shomanay rayonındaǵı Qarabaylı mákan puqaralar jıyını aymaǵında jaylasqan «Kamil Yusupov» fermer xojalıǵınıń atızlarında ǵálle hám sobıqlı eginlerdi jetistiriw boyınsha ámeliy atız seminarı bolıp ótti.
Seminarǵa rayon hákimi A.Ametov, awıl xojalıǵı tarawınıń juwapker qánigeleri, tiyisli shólkemlerdiń wákilleri, fermerler hám diyqanlar qatnastı.
Ilajda zamanagóy agrotexnikalıq usıllar, suw resurslarınan nátiyjeli paydalanıw hám ónimdarlıqtı arttırıw máseleleri boyınsha pikir alısıldı.
Seminar sheńberinde Qaraqalpaqstanda birinshi márte tájiriybe tárizinde gorox sobıqlı egininiń Shomanay rayonında egilgeni ayrıqsha atap ótildi.
Aymaqta bul egin 2 gektar maydanǵa egilgen. Qánigelerdiń atap ótiwinshe, bul egisti keleshekte aymaqta keńeytiw awıl xojalıǵı ónimleriniń túrin kóbeytiwge hám jer jáne suw resurslarınan aqılǵa uǵras paydalanıwǵa xızmet etedi.
Sonday-aq, awıl xojalıǵı tarawınıń qánigeleri fermer hám diyqanlarǵa gorox jetistiriw texnologiyası, tárbiyalaw usılları, agrotexnikalıq ilajlardı óz waqtında ámelge asırıw hám joqarı zúráát alıw boyınsha zárúr usınıslar hám maǵlıwmatlar berdi.
Atız seminarı qatnasıwshıları tárepinen jańa tájiriybelerdi engiziw, innovaciyalıq kózqaraslardı keńnen engiziw hám sobıqlı eginler maydanın basqıshpa-basqısh keńeytiw boyınsha usınıslar bildirildi.
Qaraqalpaqstan xabar agentligi