Tashkent xalıqaralıq investiciyalıq forumı ilajları sheńberinde Ózbekstan Respublikası Prezidenti Shavkat Mirziyoev AQSh Eksimbanki prezidenti hám baslıǵı Jon Yovanovich jáne Xalıqaralıq finanslıq rawajlanıw korporaciyası (DFC) bas atqarıwshı direktorı Ben Blek penen ushırasıw ótkerdi.
Ushırasıw aldınan joqarı mártebeli miymanlar mámleketimiz basshısına AQSh Prezidenti Donald Tramptıń qızǵın sálemin hám jaqsı tileklerin jetkerdi.
Sóylesiwler dawamında bul institutlardıń Ózbekstanda infrastrukturanı rawajlandırıw, áhmiyetli minerallardı ózlestiriw, energetika, jasalma intellektti engiziw hám sanlastırıw sıyaqlı joqarı texnologiyalı strategiyalıq joybarlardı qarjılandırıwda qatnasıwına baylanıslı máseleler hár tárepleme kórip shıǵıldı.
AQSh Eksimbanki menen birge islesiw baǵdarında energetika tarmaǵın modernizaciyalaw boyınsha birgeliktegi joybarlardı jedellestiriw boyınsha kelisimge erisildi. Jergilikli isbilermenlerdiń tiykarǵı tarawlardaǵı baslamaları ushın eksport kreditlerin beriwdi bunnan bılay da rawajlandırıwǵa ayrıqsha itibar qaratıldı.
“DFC” korporaciyasınıń densawlıqtı saqlaw tarawındaǵı joybarlardı qollap-quwatlaw, energetika tarmaǵı hám infrastrukturanı modernizaciyalawǵa qaratılǵan birgeliktegi investiciyalıq platformanı iske qosıw boyınsha baslamaları qollap-quwatlandı.
Tashkentte jańa xalıqaralıq aeroporttı qurıw, Ferǵana wálayatında zamanagóy medicina kompleksin shólkemlestiriw, sanlı bankti iske qosıw, data-oraylar hám qurǵaqlıqtaǵı portlardı qurıw sıyaqlı iri infrastrukturalıq joybarlardı ámelge asırıwdıń ámeliy basqıshına ótiw zárúr ekenligi atap ótildi.
Ushırasıw juwmaǵında dodalanǵan investiciyalıq hám texnologiyalıq joybarlardı alǵa qoyıw boyınsha birgeliktegi “jol kartası”n qabıl etiwge kelisip alındı.
ÓzA