Kóksaray rezidenciyasında Ózbekstan Respublikası Prezidenti Shavkat Mirziyoev hám Albaniya Respublikası Prezidenti Bayram Begay rásmiy delegaciyalardıń qatnasıwında sóylesiw ótkerdi.
Eki mámleket arasında ámeliy birge islesiwdi bunnan bılay da bekkemlew perspektivaları kórip shıǵıldı.
Ushırasıw aldınan mámleketimiz basshısı Ózbekstan hám Albaniya qatnasıqları tariyxında birinshi márte ótkerilip atırǵan bul sammit ayrıqsha áhmiyetke iye ekenin, onıń eki tárepleme birge islesiwdi sapa jaǵınan jańa basqıshqa alıp shıǵatuǵının atap ótti.
Siyasiy sóylesiw hám hár qıylı dárejedegi baylanıslar jedelleskeni qanaatlanıwshılıq penen atap ótildi. BMSh hám basqa da xalıqaralıq strukturalar sheńberinde tárepler bir-birin qollap-quwatlap kelmekte.
Tovar almasıwdı keńeytiwge, agrosanaat kompleksi, “jasıl” energetika, geologiya, málimleme texnologiyaları hám sanlastırıw, turizm hám basqa da áhmiyetli tarawlarda keń kólemli kooperaciya baǵdarlamasın tayarlawǵa ayrıqsha itibar qaratıldı.
Ózbekstan ónimlerin Qubla Evropa hám Jer Orta teńizi bazarlarına shıǵarıwda logistika xabı sıpatında Albaniyanıń Durres portınan paydalanıw imkaniyatları úyreniledi.
Ekonomikalıq hám investiciyalıq birge islesiwdiń huqıqıy tiykarların keńeytiw áhmiyetli ekenligi ayrıqsha atap ótildi.
Birge islesiwdiń ekonomikalıq kún tártibin alǵa qoyıw maqsetinde Húkimetleraralıq komissiyanı shólkemlestiriw hám onıń birinshi májilisin usı jılı Tashkent qalasında ótkeriwge kelisip alındı.
Mádeniy-gumanitarlıq tarawda tárepler óz-ara Mádeniyat kúnleri, kino tamashaları, kórgizbe hám dóretiwshilik saparlardı shólkemlestiriw áhmiyetli ekenligin atap ótti.
Jetekshiler regionallıq hám xalıqaralıq kún tártibindegi áhmiyetli máseleler boyınsha da pikir alıstı.
ÓzA