Ministrler Kabinetiniń 2026-jıl 12-iyundegi qararı menen “Jazanı orınlaw mákemelerinde qamaqtaǵılardıń jazanı ótew dáwirinde durıs ruwxıy-ádep-ikramlılıq qádiriyatlardı qáliplestiriwge qaratılǵan ádebiyatlardı oqıǵanlıǵı haqqındaǵı fakttı tastıyıqlaw boyınsha komissiya jumısın shólkemlestiriw haqqında”ǵı reje tastıyıqlandı.
Rejege bola, talabanlardıń test sınaǵın tapsırıwın qadaǵalap barıw hám nátiyjelerin juwmaq tiykarında tastıyıqlaw ushın mákeme xızmetkerleri hám jámiyetshilik wákillerinen ibarat komissiya shólkemlestiriledi.
Komissiya májilisi qaǵıyda sıpatında jılına keminde eki márte, hár jılı fevral hám avgust aylarında ótkeriledi.
Komissiya juwmaǵı talabanǵa qol qoydırılıp, tanıstırıladı hám onıń jeke jıynaǵına qosıp qoyıladı.
Juwmaqtıń kóshirme nusqası prokurorǵa jiberiledi, sonday-aq, qamaqtaǵı shaxstıń qorǵawshısına onıń sorawına bola beriledi.
Talaban test sınaǵı nátiyjeleri oǵan tanıstırılǵan kúnnen baslap, 5 jumıs kúni ishinde test ótkeriw procesi yamasa nátiyjeleri boyınsha jeke ózi yamasa qorǵawshısı arqalı sudqa shaǵım jollawı múmkin.
Sud shaǵımdı kórip shıǵıw nátiyjeleri boyınsha talaban tárepinen kórsetilgen dáliller tastıyıqlanbasa, test sınaǵı nátiyjelerin ózgerissiz, shaǵımdı bolsa qanaatlandırmay qaldırıw haqqında, talaban tárepinen kórsetilgen dáliller tiykarlı dep tabılsa, shaǵımdı qanaatlandırıw hám test sınaǵı nátiyjelerin biykarlaw haqqındaǵı qararlardıń birin qabıl etedi.
ÓzA