Prezident Shavkat Mirziyoev sudlarda komplaens qadaǵalaw sistemasınıń nátiyjeliligin arttırıwǵa baylanıslı prezentaciya menen tanıstı.
Elimizde sud-huqıq sistemasın reformalaw, ádil sudlawǵa bolǵan isenimdi bekkemlew, sudlardıń jumısında ashıq-aydınlıq hám nızamlılıqtı támiyinlew boyınsha izbe-iz jumıslar ámelge asırılmaqta.
Sonıń menen birge, sud sistemasında korrupciyalıq qáwip-qáterlerdi erte anıqlaw, mápler soqlıǵısıwınıń aldın alıw hám xızmetkerlerdiń kásiplik juwapkershiligin arttırıw áhmiyetli wazıypa bolıp qalmaqta.
Bul baǵdarda tek sudyalar emes, al derlik 4,8 mıń sud apparatı xızmetkerleriniń hadal hám pák jumıs alıp barıwı da turaqlı itibarda bolıwı kerek.
Usı múnásibet penen prezentaciyada sudlarda komplaens qadaǵalawdı kúsheytiwge qaratılǵan usınıslar dodalandı.
Sud apparatı xızmetkerleri arasında korrupciyanıń aldın alıw maqsetinde Joqarǵı sud quramında Komplaens qadaǵalaw xızmetin shólkemlestiriw usınıs etildi.
Bul xızmet tikkeley Joqarǵı sud baslıǵına boysınıp, aymaqlıq sudlarda da jumıs alıp baratuǵın komplaens inspektorlarınan ibarat boladı.
Komplaens xızmeti korrupciyalıq qáwip-qáterlerdi anıqlaw, bahalaw hám aldın alıw, olardıń sebeplerin saplastırıw, xızmetkerler tárepinen nızamshılıq hám kásiplik etika talaplarına ámel etiliwin monitoring etiw menen shuǵıllanadı.
Prezentaciya dawamında sud sistemasında korrupciyanıń aldın alıw boyınsha bir qatar basqa da ilajlar dodalandı. Atap aytqanda, sudlar apparatında joqarı qáwipli lawazımlardıń dizimi tastıyıqlanadı, qáwipli dárejesi joqarı processlerdi sanlastırıw hám insan faktorın azaytıw ilajları kóriledi.
Sudyalar ushın mápler soqlıǵısıwı, dáramat hám múlk deklaraciyaların usınıw jáne tallawdıń avtomatlastırılǵan elektron sisteması iske qosıladı. Tap usınday sistema sud apparatı xızmetkerleri ushın da engiziledi.
Sonday-aq, korrupciya, gúmanlı sxemalar hám tártipbuzarlıqlarǵa alıp keliwshi qáwiplerdi anıqlawǵa qaratılǵan elektron málimleme sistemaları iske qosıladı. Bul baǵdarda korrupciya haqqında xabar bergen xızmetkerlerdi qorǵaw, puqaralar ushın qáwipsiz baylanıs kanalların jaratıw áhmietli ekenligi atap ótildi.
2026-jıldıń aqırına shekem sud sistemasında korrupciyaǵa qarsı turaqlılıq boyınsha diagnostika ótkeriledi. Sudyalıqqa talabanlardı tayarlaw procesinde olardıń jeke-professionallıq hám korrupciyaǵa qarsı turaqlılıǵın bahalaw ámeliyatı da engiziledi.
Sud islerin avtomatikalıq bólistiriw baǵdarlaması jetilistirilip, islerdi bólistiriw hám qayta bólistiriw normaları anıq belgilenedi, processtiń ashıq-aydınlıǵı támiyinlenedi.
Sud apparatına jumısqa qabıl etiw sisteması da túp-tiykarınan jańalanadı. Ol ashıq tańlaw, ashıq-aydın tártip-qaǵıydalar hám meritokratiya principleri tiykarında shólkemlestiriledi. Talabanlardıń kásiplik, ruwxıy-ádep-ikramlılıq hám hadallıq sıpatların bahalawdıń zamanagóy sisteması engiziledi.
Xızmetkerler ushın mápler soqlıǵısıwına alıp keletuǵın jumıs hám isbilermenlik penen shuǵıllanıw, sırt elde esap bet ashıw sıyaqlı sheklewler názerde tutıladı.
Prezentaciyada sud apparatı xızmetkerleri ushın qánigelestirilgen xızmet kiyimin engiziw usınısı da kórip shıǵıldı. Bul xızmetkerlerdiń juwapkershiligi, xızmet tártibi hám etika mádeniyatın bekkemlewge xızmet etetuǵını atap ótildi.
Mámleketimiz basshısı sud sistemasında ashıq-aydınlıq, hadallıq hám ádillik ortalıǵın bekkemlew xalıqtıń sud qorǵawına bolǵan isenimin arttırıwdıń áhmiyetli faktorı ekenin, usınıslardı puqta islep shıǵıw, komplaens xızmetine maman kadrlardı tartıw zárúrligin atap ótti.
ÓzA