Ózbekstan Respublikası Prezidenti Shavkat Mirziyoev Rossiya Federaciyası Prezidenti Vladimir Putinniń mirát etiwine bola 4-iyun kúni ámeliy sapar menen Sankt-Peterburg qalasına keldi.
“Pulkovo” xalıqaralıq aeroportında joqarı mártebeli miymandı Rossiya Federaciyası Húkimeti Baslıǵınıń birinshi orınbasarı Denis Manturov, qala hákimi Aleksandr Beglov hám basqa da rásmiyler kútip aldı.
Sankt-Peterburg qalasına ámeliy sapar sheńberinde Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putinniń ushırasıwı bolıp ótti.
Ózbekstan – Rossiya keń kólemli strategiyalıq sheriklik hám awqamlaslıq qatnasıqların jáne de keńeytiw hám bekkemlew máseleleri kórip shıǵıldı.
Sawda-ekonomikalıq birge islesiw jedel rawajlanıp atırǵanı qanaatlanıwshılıq penen atap ótildi. Jıl basınan berli tovar almasıwdıń kólemi 20 procentke arttı.
Sanaat, energetika, metallurgiya, transport, ximiya sanaatı hám ekonomikanıń basqa da tiykarǵı tarmaqlarında iri joybarlardı ámelge asırıw dawam etpekte.
Tovar almasıwdaǵı házirgi pátlerdi saqlap qalıw, kooperaciya joybarların jedellestiriw hám aymaqlar dárejesindegi jedel baylanıslardı dawam ettiriw áhmiyetli ekenligi atap ótildi.
Jedel mádeniy-gumanitarlıq almasıwlardı bunnan bılay da keńeytiwge ayrıqsha itibar qaratıldı. Usı kúnlerde Mariinsk teatrında Georg Fridrix Gendeldiń “Tamerlano” operasınıń premerası bolıp ótkeni hám “Ermitaj” mámleketlik muzeyinde Ózbekstan ámeliy kórkem óneri kórgizbesi ashılǵanı atap ótildi.
Jetekshiler bolajaq ilajlardıń rejesin de dodaladı.
Bunnan soń Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putin Ózbekstanda integraciyalasqan atom elektr stanciyasınıń birinshi energiya blogın qurıw jumıslarına start berdi.
Máresimde telekópir arqalı Xalıqaralıq atom energiyası agentligi (XAEA) bas direktorı Rafael Grossi de qatnastı.
Mámleketimiz basshısı Vladimir Putin hám Rafael Grossige usı joybardıń ámelge asırılıwın jeke ózi qollap-quwatlaǵanı hám kórsetilgen itibar ushın minnetdarshılıq bildirdi. Elimizde birinshi atom elektr stanciyasın qurıwda qatnasıp atırǵan Ózbekstan hám Rossiya qánigelerine birgeliktegi háreketler hám joqarı professionallıq ushın ayrıqsha minnetdarshılıq bildirildi.
Bul joybardıń ámelge asırılıwı Ózbekstannıń texnologiyalıq, industriallıq hám ilimiy rawajlanıwında jańa basqıshtı baslap berip, jańa tarmaq – atom energetikasın rawajlandırıw ushın tiykar jaratatuǵını atap ótildi. Joybar kishi modulli atom generaciyası hám iri kólemli energetika tarawındaǵı eń sońǵı jetiskenliklerdi ózinde jámlegen.
Ózbekstan jetekshisi qáwipsizlik joybardıń pútkil hám sózsiz shárti ekenin ayrıqsha atap ótti. Stanciyanı qurıw hám onı ekspluataciyaǵa tayarlaw jumısları eń zamanagóy xalıqaralıq standartlar, aldınǵı injenerlik sheshimler tiykarında hám Xalıqaralıq atom energiyası agentliginiń turaqlı qadaǵalawı astında orınlanbaqta.
Bul úlken joybardıń ámelge asırılıwı hám onıń nátiyjeleri Ózbekstan – Rossiya keń kólemli strategiyalıq sheriklik hám awqamlaslıq qatnasıqların bunnan bılay da bekkemlewge xızmet etetuǵınına isenim bildirildi.
5-iyun kúni mámleketimiz basshısı 29-Peterburg xalıqaralıq ekonomikalıq forumınıń tiykarǵı ilajlarında qatnasıwı názerde tutılǵan.
Ózbekstan Respublikası Prezidenti Shavkat Mirziyoevtiń Rossiya Federaciyasına ámeliy saparı dawam etpekte.

ÓzA