Pútkil ómiri hám miynet jolın mámleketimizdiń awıl xojalıǵı tarawın rawajlandırıwǵa baǵıshlaǵan belgili mámleketlik hám jámiyetlik ǵayratker, miynet veteranı Amin Hamraevich Tajiev 2026-jıl 4-iyun kúni 79 jasında qaytıs boldı.
A.Tajiev 1947-jılı 12-aprelde Tórtkúl rayonında tuwıldı. Orta mektepti tamamlagannan soń Tashkent irrigaciya hám awıl xojalıǵın mexanizaciyalaw injenerleri institutı (házirgi Tashkent irrigaciya hám awıl xojalıǵın mexanizaciyalaw injenerleri institutı milliy izertlew universiteti) injener-mexanik qánigeligi boyınsha tamamladı. Miynet jolın 1968-jılı Tórtkúl rayonındaǵı Ál-Xorezmiy atındaǵı kolxozdıń texnika qáwipsizligi injeneri bolıp islewden basladı. Keyin ala Tórtkúl, Elikqala, Ámiwdárya rayonlarında basshılıq lawazımlarında isledi.
Úlken shólkemlestiriwshilik qábiletine iye bolǵan A.Tajiev Qaraqalpaqstan Respublikası Ministrler Keńesiniń baslıǵı, awıl xojalıǵı ministri, Toǵay xojalıǵı basqarmasınıń baslıǵı, Ózbekstan Respublikası mámleketlik agrosanaat komiteti baslıǵınıń birinshi orınbasarı sıyaqlı juwapkershilikli lawazımlarda pidákerlik penen miynet etti.
A.Tajiev óziniń 50 jıldan aslam miynet jolı dawamında Aralboyı regionındaǵı qıyın sharayatta aymaqtı sociallıq-ekonomikalıq rawajlandırıw, infrastruktura tarmaqların jaratıw, xalıqtıń turmıs dárejesin arttırıw boyınsha kóplegen jumıslardı ámelge asırdı.
Atap aytqanda, suw jetispewshiligin saplastırıw maqsetinde “Túyemoyın – Nókis – Taxtakópir” suwǵarıw tarmaǵın hám kóplegen sociallıq hám mádeniy obektlerdi qurıwda jankúyerlik kórsetti.
Ol pensiyaǵa shıqqannan keyin de Qaraqalpaqstan Respublikasınıń jámiyetlik turmısında belsene qatnasıp, ekologiyalıq ortalıqtı jaqsılaw, xalıq ushın qolaylı sharayatlar jaratıw, keń kólemli qurılıs, abadanlastırıw hám kóklemzarlastırıw jumısların alıp barıwǵa qaratılǵan joybarlardı ámelge asırıw, kekse áwladtıń máplerin qorǵaw, jaslardı Watanǵa muhabbat hám sadıqlıq ruwxında tárbiyalawǵa óziniń bay turmıslıq bilim hám tájiriybesin baǵıshladı.
A.Tajievtiń mámleketimizdi rawajlandırıw baǵdarındaǵı xızmetleri mámleketimiz tárepinen múnásip sıylıqlandı. Ol “El-yurt hurmati,” “Dwstlik” hám “Mehnat shuhrati” ordenleri, “Qaraqalpaqstan Respublikasına miyneti sińgen mexanizator” húrmetli ataǵı menen sıylıqlanǵan edi.
Belgili mámleketlik hám jámiyetlik ǵayratker, jaslardıń mehriyban ustazı, haq kewil hám kishipeyil insan Amin Hamraevich Tajievtiń esteligi kewillerimizde máńgi saqlanıp qaladı.

Sh.Mirziyoev, T.Norboeva, N.Ismoilov,
A.Aripov, A.Orınbaev, F.Ermonov, S.Turdiev