Ózbekstan Respublikası Prezidenti Shavkat Mirziyoev 4-iyun kúni Qıtay Xalıq Respublikası Syangan (Gonkong) arnawlı hákimshilik aymaǵı Administraciyasınıń basshısı Li Czyachao basshılıǵındaǵı delegaciyanı qabılladı.
Sóylesiw aldınan Li Czyachao mámleketimiz basshısına Qıtay Xalıq Respublikası Baslıǵı Si Czinpinniń qızǵın sálemin hám eń jaqsı tileklerin jetkerdi.
Ushırasıwda Ózbekstan – Qıtay birge islesiwin, sonıń ishinde, Gonkong penen aymaqlararalıq almasıwlar hám ámeliy birge islesiwdi keńeytiw arqalı bunnan bılay da rawajlandırıw máseleleri kórip shıǵıldı.
Sóylesiw waqtında sońǵı jıllarda Ózbekstan menen Qıtay arasındaǵı doslıq hám jańa dáwirdegi hár tárepleme strategiyalıq sheriklik qatnasıqları misli kórilmegen dárejege kóterilgeni úlken qanaatlanıwshılıq penen atap ótildi.
Joqarı dárejede erisilgen kelisimler izbe-iz ámelge asırılmaqta. May ayında Pekin qalasında Húkimetleraralıq komissiya májilisi hám Sian qalasında úshinshi Aymaqlararalıq forum tabıslı ótkerildi, Gonkongta ekonomikalıq forum hám sanaat kórgizbesi bolıp ótti, Ózbekstan sawda úyi ashıldı.
Ózbekstan aymaqlarınıń Gonkong penen ekonomikalıq birge islesiwin rawajlandırıw ushın bar potencialdan nátiyjeli paydalanıw áhmiyetli ekenligine ayrıqsha itibar qaratıldı. Tashkent qalasına Gonkong isbilermen toparlarınıń wákillerinen ibarat úlken delegaciyanıń kelgenligi bul baǵdardaǵı sheriklikti bunnan bılay da rawajlandırıwǵa xızmet etetuǵınına isenim bildirildi.
Sawda-ekonomikalıq hám finanslıq baylanıslardı keńeytiw, sanaat kooperaciyasın jolǵa qoyıw, bilimlendiriw, turizm hám isbilermenlik almasıwların rawajlandırıw jáne tikkeley aviaqatnawlar hám puqaralarǵa konsullıq xızmetlerin kórsetiwdi jolǵa qoyıwdı názerde tutatuǵın kompleksli birge islesiw baǵdarlamasın qabıl etiw áhmiyetli ekenligi atap ótildi.
“Jasıl” energetika, awıl xojalıǵı, biotexnologiyalar, sanlı ekonomika, fintex, innovaciyalıq startaplar, jasalma intellekt hám basqalar tiykarǵı tarawlar sıpatında atap ótildi.
Birge islesiwdiń tiykarǵı baǵdarları boyınsha birgeliktegi “jol kartası”n qabıl etiw, sonday-aq, Isbilermenler keńesin shólkemlestiriw hám jaqın arada Gonkong penen eki tárepleme tiykarda vizasız tártipti engiziw boyınsha kelisimge erisildi.
ÓzA