BMSh Bas Assambleyasında bolıp ótken dawıs beriw nátiyjelerine bola, Qırǵızstan óz tariyxında birinshi márte shólkemniń Qáwipsizlik keńesi quramına kirdi.
Oraylıq Aziya regionı wákili 2027-2028-jıllar dawamında keńestiń turaqlı bolmaǵan aǵzası sıpatında jumıs alıp baradı. Bul region mámleketleri derlik on jıldan berli Qáwipsizlik keńesinde wákillikke iye bolmaǵanın atap ótiw kerek. Aziya-Tınısh okeanı regionı mámleketlerine ajıratılǵan birden-bir orın ushın bolıp ótken bellesiwdiń tórtinshi turında Qırǵızstan 142 dawıs toplap, óz qarsılası bolǵan Filippindi artta qaldırdı.
Keńeske saylanıw ushın talaban mámleketler BMShqa aǵza mámleketlerdiń keminde úshten eki bólegi, yaǵnıy 127 dawıs alıwı shárt edi. Sonday-aq, bolıp ótken saylawlarda Batıs Evropa toparınan Avstriya hám Portugaliya, Latın Amerikası hám de Karib basseyni mámleketlerinen Trinidad hám Tobago, Afrika materiginen bolsa Zimbabve de Qáwipsizlik keńesi quramına saylandı.
Maǵlıwmat ushın, BMSh Qáwipsizlik keńesi jámi 15 mámleketten ibarat. Olardan 5 i Ullı Britaniya, Qıtay, Rossiya, AQSh hám Franciya veto huqıqına iye bolǵan turaqlı aǵzalar esaplanadı. Qalǵan 10 aǵza bolsa eki jıl múddetke saylanıp baradı. Bıyılǵı 2026-jıldıń aqırında ámeldegi bes turaqlı emes aǵza Greciya, Daniya, Pakistan, Panama hám Somalidiń wákillik múddeti tamamlanadı hám olardıń ornın jańadan saylanǵan mámleketler iyeleydi.
Qáwipsizlik keńesi dúnyada tınıshlıq hám turaqlılıqtı támiyinlew ushın tikkeley juwapker struktura bolıp, zárúrlik payda bolǵanda xalıqaralıq qáwipsizlikti tiklew maqsetinde hár qıylı sankciyalar engiziw yamasa kúsh isletiwge ruxsat beriw wákilligine iye bolıp esaplanadı.
F.Yaxshiboeva, ÓzAnıń xabarshısı