London qalasında ótken “Education World Forum – 2026” sheńberinde joqarı bilimlendiriwde sapanı támiyinlew tarawındaǵı eń iri xalıqaralıq tarmaqlardan biri – INQAAHE (International Network for Quality Assurance Agencies in Higher Education)ge Bilimlendiriw sapasın támiyinlew milliy agentligi tolıq aǵza boldı.
Bul aǵzalıq Ózbekstan milliy akkreditaciya sistemasınıń xalıqaralıq standartlarǵa muwapıqlıǵın ańlatadı.
INQAAHEge tolıq aǵzalıq bir qatar imkaniyatlardı keńeytedi.
Atap aytqanda, akkreditaciyadan ótken joqarı bilimlendiriw mákemeleri diplomlarınıń xalıqaralıq kólemde tán alınıwı kúsheyedi, pitkeriwshilerdiń sırt elde bilimlendiriw hám miynet etiwdi dawam ettiriw imkaniyatları keńeyedi. Bunnan tısqarı, mámleketlik akkreditaciya nátiyjeleriniń xalıqaralıq dárejede tán alınıwı artadı, joqarı oqıw orınlarınıń xalıqaralıq reytingler, akkreditaciya processleri hám grant baǵdarlamalarında qatnasıwı jeńillestiriledi.
Sonday-aq, jetekshi sırt el universitetleri menen birgeliktegi bilimlendiriw baǵdarlamaları, eki diplomlı baǵdarlamalar jáne studentler hám professor-oqıtıwshılar almasıwınıń kólemi keńeyedi.
Akkreditaciya processlerine INQAAHE tarmaǵı arqalı joqarı mamanlıqtaǵı xalıqaralıq ekspertlerdi tartıw imkaniyatı jaratıladı, bul bolsa mámleketlik akkreditaciyanıń sapasın jáne de arttıradı.
Milliy ekspertlerdiń mamanlıǵın arttırıw hám xalıqaralıq tájiriybeni sistemalı úyreniw imkaniyatları keńeyedi.
Muhayyo Toshqoraeva, ÓzA