“Uzbekistan Airports” baspasóz xızmetiniń xabar beriwinshe, 2-iyun kúni Tashkent xalıqaralıq aeroportında Armeniyanıń Shirak Avia aviakompaniyası tárepinen ámelge asırılǵan Erevan – Tashkent jónelisindegi birinshi turaqlı reys saltanatlı kútip alındı. Usı tárizde Ózbekstan hám Armeniya paytaxtları arasında sońǵı on jıllıqlardan keyin jáne tikkeley hawa qatnawı jolǵa qoyıldı.
Málim etiliwinshe, Erevannan ushıp kelgen birinshi reys penen Tashkentke 127 jolawshı jetip kelgen. Aviaciya dástúrlerine muwapıq, samolyot suw arkası astında kútip alındı, ekipaj aǵzalarına bolsa gúller usınıldı.
Sonday-aq, Tashkent xalıqaralıq aeroportında Tashkent – Erevan jónelisindegi birinshi reys jolawshıların dizimnen ótkeriw máresimi de shólkemlestirildi. Birinshi reys penen Armeniya paytaxtına 177 jolawshı jónep ketti.
Jańa aviayönalıs eki mámleket arasındaǵı turizm, biznes baylanısları hám mádeniy-gumanitarlıq birge islesiwdi bunnan bılay da rawajlandırıwǵa xızmet etedi.
Párwazlar Boeing 737 markalı samolyotlarda háptesine bir márte ámelge asırıladı. Bul jónelis ashılǵansha Ózbekstan hám Armeniya arasında sapar etiwshi jolawshılar Moskva, Stambul, Tbilisi hám basqa da qalalar arqalı tranzit reyslerden paydalanıwǵa májbúr edi.
Esletip ótemiz, Tashkent hám Erevan arasında tikkeley aviaqatnawlardı jolǵa qoyıw máselesi birinshi márte 2017-jılı Ózbekstan hám Armeniya húkimetleri basshılarınıń ushırasıwında dodalanǵan edi. 2026-jıl may ayınan bolsa usı jónelis boyınsha turaqlı párwazlardı jolǵa qoyıw rejelestirilgeni haqqında xabar berilgen edi.
2019-jıldan berli jumıs alıp barıp atırǵan Shirak Avia aviakompaniyası Erevandaǵı Zvartnoc xalıqaralıq aeroportı bazasında isleydi hám bir qatar xalıqaralıq jónelislerde xızmet kórsetedi. Kompaniya aviaparki Boeing 737 toparına tiyisli samolyotlardan quralǵan.
Sh.Mamaturopova,
ÓzA