Ózbekstan Respublikası Prezidentiniń “Jańa áwlad ilimiy kadrların tayarlaw hám olardı attestaciyalaw sistemasın jetilistiriw haqqında”ǵı pármanına muwapıq, Filosofiya doktorı (PhD) ilimiy dárejesin ámeliy izertlew joybarı sheńberinde alıwdı názerde tutatuǵın “Joybar sheńberinde ilimiy dáreje” baǵdarlaması jolǵa qoyıladı.
Baǵdarlama sheńberinde ilimiy joybarlardı ámelge asırıwdıń sonday tártibi ornatıladı, oǵan bola:
a) Innovaciyalıq rawajlanıw agentligi tárepinen tiykarǵı ilimiy qánigelikler boyınsha múddeti úsh jıldan kóp bolmaǵan izertlew joybarları ushın hár jılı bir márte tańlaw járiyalanadı;
b) izertlew joybarında qatnasıwshı doktorant joybar basshısı tárepinen tańlaw tiykarında qabıl etiledi hám joybar basshısı bir waqıttıń ózinde doktoranttıń ilimiy basshısı esaplanadı;
v) doktorant izertlew joybarı orınlanıp atırǵan shólkemniń izleniwshisi esaplanadı hám oǵan tayanısh doktorantura ushın belgilengen muǵdarda stipendiya tólenedi;
g) izertlew joybarı dáwirinde filosofiya doktorı (PhD) ilimiy dárejesin alıw ushın dissertaciyanı qorǵaǵan izertlewshi joybarınıń ilimiy esabatı ekspertizadan ótkerilmeydi;
d) Baǵdarlama ilimiy jumısqa baylanıslı mámleketlik baǵdarlamalar sheńberinde ajıratılǵan qarjılar hám nızamshılıq hújjetleri menen qadaǵan etilmegen basqa da derekler esabınan qarjılandırıladı;
j) Baǵdarlama sheńberinde tayarlanatuǵın doktorantlar sanı Mámleketlik byudjet qarjıları esabınan tayanısh doktoranturaǵa hár jılı ajıratılatuǵın qabıllaw kvotasın qáliplestiriwde esapqa alınbaydı.
Ilimiy dárejeler beriwde 2027-jıl 1-yanvardan baslap tómendegi tártipler biykar etiledi:
a) shet tili páninen qánigelik imtixan tapsırıw, erkin izleniwshiler buǵan kirmeydi;
b) Joqarı attestaciya komissiyası tárepinen dissertaciya temaların dizimnen ótkeriw hám dissertaciya qorǵawı haqqında daǵaza beriw;
v) dissertaciyanı jetekshi shólkemde dodalawdan ótkeriw;
g) sociallıq-gumanitarlıq pánler tarawları boyınsha ilim doktorı (PhD) ilimiy dárejesi ushın tayarlanǵan dissertaciya nátiyjeleri boyınsha monografiya járiyalaw;
d) dissertaciya avtoreferatın basıp shıǵarıw;
j) dissertaciya ilimiy nátiyjesiniń ámeliyatqa engizilgenligi haqqında juwmaq alıw;
z) Joqarı attestaciya komissiyasınıń pán tarmaqları boyınsha ekspert keńesi tárepinen dissertaciyanı ilimiy ekspertizadan ótkeriw;
i) qorǵalǵan dissertaciya boyınsha ilimiy keńes qararın Joqarı attestaciya komissiyası tárepinen tastıyıqlaw;
k) bilimlendiriw hám ilimiy-izertlew jumısı ushın tartılǵan sırt el puqarasınıń sırt elde alǵan ilimiy dárejesi haqqındaǵı hújjetlerin nostrifikaciyalaw. Onda ilimiy dáreje haqqındaǵı hújjet onıń Ózbekstandaǵı jumısı dawamında tikkeley tán alınadı.
ÓzA