Húrmetli Qasım-Jomart Kemelevich!
Húrmetli mámleketler hám delegaciyalar basshıları!
Bárinen burın, Qazaqstan Respublikası Prezidenti, húrmetli Qasım-Jomart Kemelevich Toqaevqa dástúriy jıllı júzlilik penen qabıllaǵanı hám miymandos Astanada ushırasıwımızdı joqarı dárejede shólkemlestirgeni ushın shın júrekten minnetdarshılıq bildiremen.
Jáhán ekonomikasında keń kólemli texnologiyalıq transformaciya procesi júz berip atırǵan bir dáwirde Qazaqstannıń Evraziya ekonomikalıq awqamındaǵı nátiyjeli basshılıǵın ayrıqsha atap ótpekshimen.
Sammitimiz qarsańında jasalma intellekt hám sanlı rawajlanıw máselelerine arnalǵan besinshi Evraziya ekonomikalıq forumınıń ashılıwı simvolikalıq mánige iye. Búgingi kúnde áyne sanlı texnologiyalar, zamanagóy logistika sheshimleri hám sanaat kooperaciyası kóp jaqtan mámleketlerdiń básekige shıdamlılıǵın, bazarlardıń turaqlılıǵın hám milliy ekonomikalardıń sırtqı qáwiplerge múnásip juwap qaytara alıw qábiletin belgilemekte.
Húrmetli kásiplesler!
Ózbekstan ushın EAEA mámleketleri menen ámeliy sheriklikti keńeytiw sırtqı ekonomikalıq siyasattıń eń áhmiyetli baǵdarlarınan biri bolıp qalmaqta.
Búgingi kúnde biziń EAEA mámleketleri menen óz-ara birge islesiwimiz kompleksli ekonomikalıq sheriklik túske endi. Óz-ara sawda kólemi artpaqta, sanaat kooperaciyası tereńlespekte, logistikalıq baylanıslar bekkemlenbekte, sanlı ekonomika, energetika hám xızmetler tarawında jańa baǵdarlar qáliplespekte.
Ózbekstan Awqamnıń barlıq tiykarǵı ilajlarında belsene qatnaspaqta. Bıyıl Evraziya ekonomikalıq komissiyası menen úsh jıllıq Sheriklik rejesin ámelge asırıwdı juwmaqlamaqtamız. Ózbekstan húkimeti Birlesken jumısshı toparınıń náwbettegi májilisin usı jıldıń gúzinde Tashkent qalasında ótkeriwge tayarlıq kórmekte. Onıń sheńberinde keyingi dáwirge mólsherlengen jańa Sheriklik rejesin qabıl etiwdi usınıs etemiz.
Jaqında texnikalıq tárepten tártipke salıw sistemaların jaqınlastırıw boyınsha «jol kartası» tastıyıqlandı. Sawda hám júk tasıwlardı sanlastırıw, elektron kommerciyanı rawajlandırıw hám klimat boyınsha kún tártibindegi máseleler boyınsha tarmaq baǵdarlamalarında qatnasıwımızdı dawam ettirmektemiz.
Tashkent qalasında Evraziya rawajlanıw bankiniń mámleketlik ofisin ashtıq, birgelikte anıq joybarlar portfeli qáliplestirildi.
Húrmetli májilis qatnasıwshıları!
EAEA menen sherikligimizdi rawajlandırıwdıń baslı baǵdarların qısqasha kórsetip ótpekshimen.
Birinshi. Ózbekstan hám EAEA mámleketleri arasında tosqınlıqlarsız sawdanıń birden-bir sanlı keńisligin qáliplestiriwge kirisiwdi áhmiyetli dep esaplaymız.
Bul jerde gáp elektron kommerciyanı rawajlandırıw hám onı tártipke salıw boyınsha kózqaraslardı muwapıqlastırıw, bajıxana, fitosanitariya hám veterinariya qadaǵalawı tarawlarında sanlı maǵlıwmat almasıwın jolǵa qoyıw, tovarlardıń kelip shıǵıwın sertifikatlaw, sonıń menen birge, elektron hújjetlerdi basqıshpa-basqısh óz-ara tán alıw haqqında barmayqta.
Sonday-aq, sanlı tranzitti engiziw, baqlaw sistemalarına jalǵanıw hám ótkeriw punktlerin modernizaciyalaw arqalı «aqıllı» transport-bajıxana koridorların jaratıw jumıslarına kirisiw maqsetke muwapıq.
Ekinshi. Sanaat kooperaciyasınıń rawajlanıwına jańa pát beriw áhmiyetli.
Biz biznestiń óndiristi lokalizaciyalawǵa, texnologiyalıq sheriklikke hám jańa óndiris shınjırların qáliplestiriwge qızıǵıwshılıǵı artıp atırǵanın kórmektemiz. Bunı usı jıldıń aprel ayında Tashkent qalasında tabıslı ótkerilgen altınshı «INNOPROM. Oraylıq Aziya» kórgezbesi de tastıyıqlaydı.
Mámleketlerimiz arasında sanaat kooperaciyası baǵdarlamasın tayarlawda bul kórgezbeniń potencialınan paydalanıwdı usınıs etemiz. Sanaat avtomatizaciyası hám robototexnika, energetika ushın komplektlewshi bólekler islep shıǵarıw, suwdı únemlewshi texnologiyalar, zamanagóy qurılıs materialları hám basqa tarawlardı perspektivalı baǵdarlar qatarında atap ótiw múmkin.
Ózbekstanda kooperaciya boyınsha «bir ayna» formatında Evraziya ekonomikalıq komissiyası menen birgelikte sheriklerdi tańlaytuǵın, erkin sanaat zonalarımız negizinde baslamalardı qollap-quwatlaytuǵın, qarjılandırıwdı tartıwǵa kómeklesetuǵın birlesken joybar ofisin shólkemlestiriwge tayarmız.
EAEA mámleketlerinen keletuǵın joqarı texnologiyalı rezidentler ushın qosımsha xoshametlewshi sharayatlardı islep shıǵıwǵa tayarmız.
Úshinshi. Energiya nátiyjeliligin arttırıw, taza texnologiyalardı engiziw hám ónimlerdiń uglerod sıyımlılıǵın azaytıwǵa qaratılǵan Sanaattı «jasıl» transformaciyalaw qospa baǵdarlamasın qabıl etiwdi usınıs etemiz.
Bul endi mámleketlerimiz ushın tek ǵana ekologiyalıq kún tártibindegi másele emes, al sanaattıń uzaq múddetli básekige shıdamlılıǵın támiyinleytuǵın áhmiyetli faktorǵa aylanbaqta.
Qospa «jasıl» joybarlar portfelin qáliplestiriw, olardı qarjılandırıwdıń jańa mexanizmlerin rawajlandırıw, jasalma intellekt texnologiyaların qollanıw arqalı sanaattıń áhmiyetli tarmaqların modernizaciyalaw ámeliy ilajlar sıpatında baǵdarlamadan orın alıwı múmkin.
Tórtinshi. Bántlik boyınsha milliy elektron xızmetlerdi óz-ara baylanıstırıw arqalı shólkemlestirilgen miynet migraciyası tarawındaǵı sheriklikti sapa jaǵınan jańa basqıshqa alıp shıǵıwdı áhmiyetli dep esaplaymız.
Bul jerde gáp puqaralardıń isenimli bos jumıs orınları, jumısqa jaylasıw shártleri hám migraciya nızamshılıǵı normaları haqqındaǵı maǵlıwmatlardan tikkeley paydalanıwın támiyinleytuǵın qolaylı hám pútin sanlı ortalıqtı qáliplestiriw haqqında barmaqta. Bul bir waqtıniń ózinde mámleketlerimiz miynet bazarlarınıń talapların esapqa alıw, xızmetkerlerdiń kásiplik sheberligin arttırıw, puqaralardıń huqıqların qorǵawdı kúsheytiw hám nızamǵa qarsı bántlik qáwiplerin kemeytiw imkaniyatın beredi.
Besinshi. Búgingi kúnde turizm mádeniy-gumanitar tarawdaǵı sherikligimizdiń eń jedel rawajlanıp atırǵan baǵdarlarınıń birine aylanbaqta.
Biz «Oraylıq Aziya turizm sheńberi» baslamasın alǵa qoydıq. EAEA mámleketlerin oǵan qatnasıwǵa hám bul turizm baǵdarın ǵalabalıq sanlı platformalarda birgelikte úgit-násiyatlawǵa shaqıramız.
Húrmetli kásiplesler!
Sózimniń juwmaǵında Evraziya ekonomikalıq awqamı menen ámeliy sheriklikti bunnan bılay da rawajlandırıwǵa umtılısımız qatań ekenligin jáne bir márte tastıyıqlaǵım keledi.
Ózbekstannıń joqarıda atap ótilgen birlesken baslama hám joybarlarda qatnasıwı óz-ara paydalı sheriklikti bekkemlewge hám mámleketlerimizdiń turaqlı rawajlanıwına kómeklesetuǵınına isenemen.