Prezident Shavkat Mirziyoev Xalıqaralıq kongress orayında Ózbekstanda kitapqumarlıqtı rawajlandırıw boyınsha ulıwma milliy háreketke start beriw máresiminde qatnastı.
Mámleketimiz basshısı búgin dúnya jedellik penen ózgerip atırǵanın, sanlı texnologiyalar, zamanagóy gadjetler hám jasalma intellekt turmısımızǵa barǵan sayın tereń kirip atırǵanın atap ótti. Bunday qıyın sharayatta insannıń erkin pikirley alıwı eń úlken abzallıq ekeni atap ótildi.
– Kitap oqıǵan adam tereń hám salamat pikirleydi. Bunday pikirge iye insan bolsa jámiyetti ózgerte aladı, – dedi Prezident.
Atap ótilgenindey, Jańa Ózbekstanda kitapqumarlıq mádeniyatı hám kitapqa itibar mámleketlik siyasat dárejesine kóterilmekte. Kitapqumarlıq tek ǵana bilimlendiriw máselesi emes, al millet keleshegi, xalqımızdıń ruwxıy qúdireti hám mámlekettiń básekige shıdamlılıǵın támiyinleytuǵın áhmiyetli faktor bolıp tabıladı.
Mámleketimiz basshısı ullı babalarımız – Imam Buxariy, Muhammed Xorezmiy, Axmed Ferǵaniy, Áliysher Nawayı, Mırza Ulıǵbek sıyaqlı oyshıllar adamzat civilizaciyasına úlken úles qosqanın atap ótti. Olardıń joqarı sheklerge erisiwinde ilimge umtılıw hám kitap oqıw tiykarǵı derek bolǵan.
Usı mániste, mámleketimiz xalıqaralıq maydanda qúdiretli hám joqarı potencialǵa iye xalıq sıpatında ózin kórsetiwi ushın eki bekkem tiykarǵa súyeniwi zárúr ekenligi atap ótildi. Bular – biybaha ilimiy hám ruwxıy miyrasımız jáne zamanagóy ilim hám aldınǵı texnologiyalar bolıp esaplanadı.
Prezidentimiz óz jumısınıń dáslepki kúnlerinen jaslardı kitapqa qızıqtırıw, olarda bilimge mehir hám qızıǵıwshılıq oyatıwǵa tiykarǵı áhmiyet qaratıp kiyatırǵanın atap ótti. 2017-jıldan berli ótkerilip kiyatırǵan “Jas kitapqumar” tańlawı millionlaǵan jaslardı kitapqa jaqınlastırdı. “Jas kitapqumar shańaraq” tańlawı bolsa kitapqumarlıq ortalıǵın hár bir shańaraqqa alıp kiriwge xızmet etpekte.
Usı jıldıń basında qabıl etilgen qarar tiykarında eń belsendi kitapqumarlardı qollap-quwatlaw boyınsha jańa sistema jolǵa qoyıldı. Kúni keshe “Jas kitapqumar” tańlawınıń gezektegi respublikalıq basqıshı juwmaqlandı. Onda mámleketimizdiń barlıq aymaqlarınan kelgen 42 eń bilimli hám ziyrek jaslar óz qábiletin hám potencialın kórsetti. Tańlawdıń úsh jeńimpazı Prezident sawǵası – zamanagóy avtomobiller menen sıylıqlandı.
Mámleketimiz basshısı jeńimpazlardı, olardıń ustazları hám ata-anaların qızǵın qutlıqlap, bunday qábiletli, izleniwsheń hám bilimge qushtar jaslar Jańa Ózbekstannıń haqıyqıy tayanıshı ekenin atap ótti.
Máresimde kitapqumarlıqtı rawajlandırıw boyınsha xalıqaralıq tájiriybege de itibar qaratıldı. Atap aytqanda, Birlesken Arab Ámirliklerinde 2015-jılı Shayx Muhammad bin Rashid Ol Maktumnıń baslaması menen baslanǵan “Arab kitapqumarlıq tańlawı” baǵdarlaması búgingi kúnde dúnyadaǵı eń iri aǵartıwshılıq háreketlerden birine aylanǵanı atap ótildi. Qısqa waqıt ishinde bul baslama 200 millionnan aslam oqıwshını qamtıp alǵan.
Ózbekstan hám Birlesken Arab Ámirlikleri arasındaǵı jaqın doslıq hám strategiyalıq sheriklik sheńberinde bul iygilikli ideyanı milliy ruwxıy miyrasımız tiykarında elimizde jańa basqıshqa alıp shıǵıwǵa qarar etildi.
Usı maqsette “Milliy kitapqumarlıq háreketi” baǵdarlaması baslanbaqta. Mámleketimiz basshısı kúni keshe bul baǵdarlamanı mámleket kóleminde belsene qollap-quwatlaw boyınsha ayrıqsha biylikke qol qoyǵanın atap ótti.
Endi hár jılı bul ilajdıń final basqıshı Prezident dárejesinde ótkeriledi. Baǵdarlamanıń ulıwma jıllıq sıylıq fondı 240 mıń dollardı quraydı. Bas sıylıqtıń iyesi 50 mıń dollar menen sıylıqlanadı. Bul elimiz tariyxında kitapqumarlıq boyınsha eń salmaqlı sıylıq boladı.
Bul háreket mámleketimizdiń barlıq aymaqların qamtıp aladı. Onda ulıwma bilim beriw mektepleriniń 1-klasstan 11-klassqa shekemgi oqıwshıları qatnasıwı múmkin.
Prezidentimiz bul baslama mekteplerde, shańaraqlarda hám pútkil jámiyette kitapqumarlıq ortalıǵın kúsheytiw, jaslardıń kewlinde jańa dóretiwshilik ruwxın oyatıwǵa xızmet etetuǵının atap ótti.
– Men bul baǵdarlamanı tek ǵana kitap oqıw jarısı emes, al janajan Watanımız keleshegi ushın strategiyalıq investiciya dep bilemen. Eger biz búgin balalarımızdıń qolına jaqsı kitap bersek, erteń olar Jańa Ózbekstannıń ullı keleshegin qurıwǵa álbette uqıplı boladı, – dedi mámleketimiz basshısı.
Máresimde Prezidentimiz barlıq oqıwshı-jaslar, ustazlar, ata-analar hám keń jámiyetshilikti usı ulıwma milliy hárekette belsene qatnasıwǵa shaqırdı.
Kitap oqıǵan, bilimge umtılǵan hám iygilikli mánilerdi ańlaǵan millet hesh qashan jeńilmeytuǵını atap ótildi. “Ilimnen basqa mádet joq” degen aǵartıwshı ata-babalarımız ideyasın pútkil mámleket kóleminde turmısqa engiziw áhmiyetli ekenligi atap ótildi.
ÓzA