Prezident Shavkat Mirziyoev “Keleshek ushın” perspektivalı baslamalar forumı sheńberinde saylap alınǵan joybarlardıń prezentaciyası menen tanıstı.
Elimizde ámelge asırılıp atırǵan reformalardıń áhmiyetli tárepi – xalıqtıń, ásirese, jaslar hám intaker puqaralardıń aldıńǵı ideyaların qollap-quwatlaw, olardı ámeliy joybarlarǵa aylandırıw ushın ashıq hám nátiyjeli mexanizmler jaratıw bolıp esaplanadı.
Usı maqsette Prezidentimizdiń 2025-jıl 14-iyuldegi “Reformalardı ámelge asırıwda perspektivalı baslamalardı bunnan bılay da qollap-quwatlaw boyınsha qosımsha ilajlar haqqında”ǵı pármanına muwapıq, “Keleshek ushın” perspektivalı baslamalar forumın ótkeriw ámeliyatı jolǵa qoyılǵan. Onıń tiykarǵı maqseti keń jámiyetshilik tárepinen alǵa qoyılıp atırǵan áhmiyetli usınıslardı tańlap alıw, qollap-quwatlaw hám turmısqa engiziwden ibarat.
Forum sheńberinde kelajakuchun.gov.uz kraudplatforması iske qosıldı. Bul arqalı xalıq óz baslamaların ashıq túrde usınıw, olardı dodalaw hám ekspertlik bahalawdan ótkeriw imkaniyatı jaratıldı.
Bıyılǵı forum ushın shólkemlestiriw komiteti tárepinen isbilermenlikti rawajlandırıw hám bántlikti támiyinlew, ekologiya, suw támiynatı hám “jasıl” energetika qamtıp alıwın keńeytiw, sanlı texnologiyalar hám jasalma intellektti engiziw, medicina hám bilimlendiriwdiń sapasın arttırıw, sud-huqıq sistemasın zamanagóy kózqaraslar tiykarında rawajlandırıw tiykarǵı baǵdarlar etip belgilendi.
Forum járiyalanǵannan soń, xalıqtan 1 mıń 300 den aslam usınıs hám baslamalar kelip tústi. Dáslep olar Strategiyalıq rawajlanıw hám reformalar agentligi jáne “Biznesti rawajlandırıw banki” tárepinen kórip shıǵılıp, belgilengen tiykarǵı baǵdarlar kesiminde ulıwmalastırıldı.
Bunnan soń baslamalar Mentorlar keńesiniń aǵzaları hám taraw ekspertleriniń qatnasıwında tallanıp, ámeliy áhmieti, engiziw imkaniyatı, sociallıq-ekonomikalıq nátiyjesi hám keńeytiw perspektivaları kózqarasınan bahalandı. Bul process juwmaqları boyınsha eń áhmiyetli joybarlar “TOP-50” hám “TOP-10” dizimlerine saylap alındı.
Forumnıń birinshi kúninde “TOP-10” baslama avtorların sıylıqlaw máresimi bolıp ótti. Jeńimpazlarǵa sertifikatlar hám aqshalay sıylıqlar tapsırıldı.
Mámleketimiz basshısına usınılǵan joybarlar arasında jol qurılısında plastikalıq shıǵındılardan paydalanıw, innovaciyalıq hawa tazalaw úskenesin islep shıǵıw, shetki aymaqlardı kóshpeli qurılma járdeminde energiya menen támiyinlew, piyadalar jolında avtomatlastırılǵan eskertiw sistemasın engiziw, milliy injenerlik platformasın jaratıw sıyaqlı baslamalar bar.
Prezentaciyada bul ideyalardıń hár biri belgili bir sociallıq yamasa ekonomikalıq mashqalanı sheshiwge qaratılǵanı atap ótildi.
Joybarlar tiyisli baǵdarlar boyınsha Ekologiya hám klimat ózgeriwi milliy komiteti, Awıl xojalıǵı ministrligi, Joqarı bilimlendiriw, ilim hám innovaciyalar ministrligi, Sanlı texnologiyalar ministrligi, Ádillik ministrligi, Mektepke shekemgi hám mektep bilimlendiriwi ministrligi, Ishki isler ministrligi, Transport ministrligi, Avtomobil jolları komiteti hám basqa da juwapker shólkemlerge biriktiriledi.
Olardı ámelge asırıw boyınsha ilajlar rejesi tastıyıqlanıp, hár bir baslamanıń orınlanıwı sistemalı túrde baqlap barıladı. “Biznesti rawajlandırıw banki” ARB perspektivalı joybarlardı qarjılandırıw hám olardıń orınlanıwın turaqlı monitoring etiwde qatnasadı.
Mámleketimiz basshısı baslamalardıń ámeliy nátiyjesine ayrıqsha itibar qaratıw, avtorlar menen birge islesiw, hár bir joybardı turmıslıq, ekonomikalıq nátiyje beretuǵın hám adamlarǵa payda keltiretuǵın sheshimge aylandırıw áhmiyetli ekenligin atap ótti.

ÓzA