Húrmetli ánjuman qatnasıwshıları!
Bárinen burın, siz, ázizlerdi túrkiy civilizaciyanıń áyyemgi oraylarınan biri bolǵan eski hám bárqulla náwqıran Samarqand qalasında shın júrekten qutlıqlawdan quwanıshlıman.
Álbette, bul májilistiń bárqulla ádillik principlerine súyenip jumıs islegen Sahıpqıran Ámir Temur saltanatınıń paytaxtında, ol insannıń 690 jıllıq qutlı tuwılǵan kúni xalıqaralıq kólemde keńnen belgilenip atırǵan kúnlerde bolıp ótip atırǵanı ánjumanǵa ayrıqsha kóterińkilik baǵıshlamaqta.
Dúnya jámiyetshiligindegi ornı hám abırayı barǵan sayın artıp atırǵan Túrkiy mámleketler shólkeminiń búgingi kúnde túrkiy birlik hám rawajlanıw baǵdarında áhmiyetli rol atqarıp atırǵanı bárshemizge joqarı maqtanısh baǵıshlaydı.
Húrmetli doslar!
Túrkiy mámleketler shólkeminiń jumısında nızam ústinligin támiyinlew, nátiyjeli basqarıw hám insan huqıqların qorǵaw máseleleri ayrıqsha orın iyeleydi. Ásirese, dúnyanıń geosiyasiy kartasında túpkilikli ózgerisler júz berip atırǵan, qarama-qarsılıqlar kólemi, kelispewshilikler kúsheyip atırǵan házirgi qıyın jaǵdayda áne usı máselelerdi birgelikte dodalaw hám bul baǵdarda nátiyjeli sheshimler tabıw ayrıqsha áhmiyetke iye.
Álbette, mámleketlerimiz turmısında ádillik hám nızam ústinligin támiyinleytuǵın, insan huqıqların qorǵaytuǵın hám kúshli sudyalar korpusın jaratıwda Sudyalar keńeslerinen úmitimiz úlken.
Mine, usı kózqarastan qaraǵanda, búgingi májilis kún tártibine kirgizilgen máseleler Keńeslerdiń keleshektegi jumısında jańa baǵdarlardı belgilep beredi, dep isenemen.
Atap aytqanda, ánjuman sheńberinde qol qoyılıwı kútilip atırǵan Aǵza mámleketlerde Sudyalar ádebiyatınıń ulıwmalıq principleri haqqındaǵı óz-ara túsinisiw memorandumı túrkiy xalıqlardıń tariyxıy-huqıqıy dástúrleriniń ulıwmalıǵın hám sud sistemaları arasında ulıwmalıq ádep-ikramlılıq normalarınıń birligin bekkemlewge xızmet etedi.
Sonday-aq, bul áhmiyetli hújjet sudyalardıń xalıqaralıq kólemde tán alınǵan minez-qulıq normalarınıń áhmiyetin tán alıp, milliy huqıqıy dástúrlerge húrmet penen qatnas jasawdı da názerde tutadı.
Usı jıldıń 6-may kúni Tashkentte bolıp ótken Ádil sudlaw akademiyaları forumında sud-huqıq tarawında túrkiy mámleketler bilimlendiriw sistemasın shólkemlestiriwdiń minimal standartlarına baylanıslı xalıqaralıq hújjet qabıl etilgenin atap ótiw kerek.
Bul mámleketlerimizde sudyalardı tayarlawdıń jańa hám universal sistemasın engiziwge qaratılǵanı menen ayrıqsha dıqqatqa ılayıq.
Qádirli ánjuman qatnasıwshıları!
Sizler Samarqand májilisinde barlıq mámleketler ushın tiykarǵı wazıypalardan biri bolǵan nızam ústinligin támiyinlew hám insan huqıqların qorǵawday iygilikli maqsetler jolında salmaqlı nátiyjelerge erisesiz, dep isenemen.
Eń áhmiyetlisi, bunday forumlar mámleketlerimiz arasındaǵı strategiyalıq sheriklik, xalıqlarımız arasındaǵı jaqın doslıq hám tuwısqanlıq baylanısların jáne de bekkemlewge, túrkiy dúnyanıń xalıqaralıq maydandaǵı abıray-mártebesin arttırıwǵa xızmet etetuǵını sózsiz.
Sizlerdi usı ilajdaǵı qatnasıwıńız benen jáne bir márte qutlıqlap, oǵada maqtanıshlı hám juwapkershilikli jumısıńızda úlken áwmetler, bekkem densawlıq, ánjuman jumısına bolsa tabıslar tileymen.

Shavkat Mirziyoev,
Ózbekstan Respublikasi Prezidenti