Párman hám onıń orınlanıwı

Cońǵı jılları Prezidentimizdiń basshılıǵında elimizde sport tarawında rawajlandırıwǵa ayrıqsha itibar qaratılmaqta.
Bul baǵdarda Xojeli rayonında da bir kansha ilajlar ámelge asırılmaqta. Búgingi kúnde Xojeli rayonı sport mektebinde jaslardıń sportqa bolǵan qızıǵıwshılıǵı artıp, olar ózleri qızıqqan sport túrleri menen turaqlı shuǵıllanıp kelmekte. Ásirese, sporttıń boks túri boyınsha nátiyjeler itibarǵa ılayıq.
Xojeli rayonı sport mektebinde búgingi kúnde boks boyınsha 13 trener jas sportshılar menen islesip kelmekte. Olardan 7 sportshı joqarı maǵlıwmatqa, 1 trener joqarı kategoriyaǵa, 4 trener birinshi kategoriyaǵa iye.
Búgingi kúnde sporttıń boks túri boyınsha 452 sportshı 43 toparda shuǵıllanıp kelmekte. Olardıń arasında 18 qız sportshı bar bolıp, olar da jaqsı jetiskenliklerge erispekte.
Prezident Olimpiadasında Ulbosın Djalǵasbaeva 1-orındı iyelep, treneri Maqset Jumabaevtıń miynetlerin aqladı. Sonday-aq, Prezident Olimpiadasınıń respublika basqıshına Miradil Maxmudov hám Jaxangir Jumamuratov múnásip qatnasıp qayttı.
Trenerler qatarında Ózbekstannıń burınǵı professional boksshısı, Aziya oyınları chempionı Alisher Avezbaevtıń da xızmet alıp barıp atırǵanı itibarǵa ılayıq. Ol óziniń bay tájriybesin jas sportshılarǵa úyretip kelmekte.
Ótken jılı xojelishi sportshılar Qaraqalpaqstan hám Ózbekstan chempionatları, kubok jarısları hám xalıqaralıq turnirlerge tabıslı qatnasıp, jámi 53 medal, yaǵnıy 8 altın, 19 gúmis hám 11 qola medaldı qolǵa kirgizdi.
– Biziń tiykarǵı maqsetimiz — jaslardı sportqa keńnen tartıw hám olardı barınsha qollap-quwatlaw, – deydi Xojeli rayonı sport mektebiniń direktori Isa Tursınbaev. – Sportshılarımızdıń jetiskenlikleri bizge jáne de úlken juwapkershilik júklemekte.

Sárbinaz Seytnazarova
Berdaq atındaǵı QMU qaraqalpaq filologiyası xám jurnalistika fakultteti 1- kurs studenti
Qaraqalpakstan xabar agentligi