Qádirli doslar, áziz miymanlar!
Bárinen burın, xalıqaralıq at sportı jarısınıń juwmaqlarına baǵıshlap ótkerilip atırǵan bul saltanatlı máresimde qatnasıp atırǵan barlıq watanlaslarımız hám húrmetli miymanlarımızdı qızǵın qutlıqlayman.
Jarıslarda joqarı sheberlik hám mártlik, milliy dástúrlerge sadıqlıq úlgisin kórsetip, úlken nátiyjelerge erisken barlıq jeńimpaz hám sıylı orın iyelerin qızǵın qutlıqlaymız.
Búgingi máresim paytaxtımızdaǵı sawlatlı hám payızlı “Ashxabad” baǵında ótkerilip atırǵanında tereń simvolikalıq máni bar. Bul gózzal orın tek ǵana óziniń tákirarlanbas arxitekturalıq kórinisi menen emes, al ózbek hám túrkmen xalıqları arasındaǵı kóp ásirlik doslıq, jaqsı qońsıshılıq, óz-ara isenim hám birdey ruwxıy tamırlardıń ayqın tımsalı sıpatında ayrıqsha áhmiyetke iye.
Usı kúnlerde mámleketlerimiz wákilleri arasında ótkerilgen jarıslar hám onıń jeńimpazlarına húrmet kórsetiwge baǵıshlanǵan bul saltanatlı ilaj da xalıqlarımız arasındaǵı ruwxıy jaqınlıqtı bunnan bılay da bekkemlewge xızmet etetuǵınına gúman joq.
Ázel-ázelden azatlıq, mártlik, sadıqlıq, erlik hám gózzallıq tımsalı bolıp kelgen atqa mehir hám itibar Oraylıq Aziya xalıqlarına tán bolǵan ullı pazıylet bolıp esaplanadı. Házirgi waqıtta da tuwısqan ellerimiz mine usı biybaha miyrastı múnásip dawam ettirip, shabandozlıq kórkem ónerin jáne de joqarı basqıshqa alıp shıǵıp atırǵanın ayrıqsha atap ótiw kerek.
Húrmetli ánjuman qatnasıwshıları!
Xalıqaralıq kólemde at sportın rawajlandırıw boyınsha Túrkmenstan Prezidenti húrmetli Serdar Gurbangulievich Berdimuhamedov hám Túrkmen xalqınıń milliy jetekshisi, Túrkmenstan Xalıq Másláháti Baslıǵı, qádirli dostım Gurbanguli Myalikgulievich Berdimuhamedovtıń basshılıǵında ámelge asırılıp atırǵan izbe-iz reformalar sebepli mámleket úlken jetiskenliklerge erispekte, xalıqaralıq maydanda óz abırayın bekkemlemekte.
Dúnya jámiyetshiligi Túrkmenstannıń tınıshlıqtı súyiwshi, konstruktivlik siyasatın, mámleketti sociallıq-ekonomikalıq rawajlandırıw, milliy qádiriyatlardı qásterlep saqlaw hám mádeniy miyrastı bayıtıw baǵdarındaǵı tabısların joqarı tán almaqta.
Bul haqqında sóz etkende, áyyemgi axalteke jılqıshılıǵı dástúrlerin múnásip dawam ettiriw, onıń dańqın pútkil dúnyaǵa úgit-násiyatlaw baǵdarında ámelge asırılıp atırǵan jumıslardı ayrıqsha atap ótiw orınlı boladı.
Búgingi kúnde axalteke tulparları tek ǵana túrkmen xalqınıń milliy maqtanıshı emes, al pútkil regionımızdıń mádeniy miyrasınıń biybaha dúrdanası sıpatında qádirlenbekte.
“Ǵárezsiz biytárep Túrkmenstan – maqsetke umtılıwshı qanatlı tulparlar watanı,” dep járiyalanǵan bıyılǵı jılı ótkerilip atırǵan ruwxıy-aǵartıwshılıq ilajlar, xalıqaralıq ánjumanlar, ilimiy forumlar hám bayram saltanatları dúnya xalıqlarınıń shabandozlıq kórkem ónerine bolǵan qızıǵıwshılıǵın jáne de arttırmaqta.
Jańa Ózbekstanda da milliy qádiriyatlardı qásterlep-saqlaw, ata-babalarımızdan miyras siyrek ushırasatuǵın dástúrlerdi keleshek áwladlarǵa zıyansız jetkeriw mámleketlik siyasattıń tiykarǵı baǵdarlarınan birine aylanǵan. Atap aytqanda, milliy sport túrlerin rawajlandırıw, at sportın ǵalaba en jaydırıw, násilli jılqıshılıqtı qollap-quwatlaw hám zamanagóy infrastrukturanı jaratıw baǵdarında keń kólemli jumıslar ámelge asırılmaqta.
Sheber shabandozlar, tájiriybeli seyisler hám pidayı qánigelerimiz bul tarawdaǵı milliy mekteplerdiń abırayın joqarılatıw, jas áwladtı kúsh-ǵayrat, watansúyiwshilik hám salamat turmıs tárizi ruwxında tárbiyalawǵa múnásip úles qospaqta.
Biz keleshekte de mámleketlerimiz arasında mádeniy-gumanitarlıq baylanıslardı keńeytiw, ázeliy doslıǵımızdı bunnan bılay da bekkemlew jolında barlıq háreketlerimizdi jumsaymız.
Pursattan paydalanıp, jarıslarda joqarı nátiyjelerge erisken barlıq jeńimpaz hám sıylı orın iyelerin jáne bir márte qızǵın qutlıqlayman.
Bársheńizge bekkem densawlıq, shańaraqlıq baxıt, juwapkershilikli hám maqtanıshlı jumısıńızda úlken tabıslar tileymen.
Ózbek-túrkmen doslıǵı hámiyshe máńgi bolsın!
Shavkat Mirziyoev,
Ózbekstan Respublikası Prezidenti