Túrkstan qalasında Ózbekstan Respublikası Prezidenti Shavkat Mirziyoevtiń qatnasıwında Túrkiy mámleketler shólkeminiń rásmiy emes sammiti baslandı.
Kongress orayında mámleketimiz basshısın Qazaqstan Respublikası Prezidenti Qasım-Jomart Toqaev qızǵın kútip aldı.
Delegaciyalardıń basshıları birgelikte súwretke tústi.
Májilis baslanıwınan aldın jetekshiler Túrkiy civilizaciya orayı qurılısınıń tırnaǵın qalaw máresiminde qatnastı.
Qazaqstannıń baslaması menen qurılıp atırǵan bul kompleks túrkiy xalıqlardıń uqsas tamırları, bay tariyxıy-mádeniy miyrası hám civilizaciyalar birligin kórsetiwge xızmet etedi. Joybar túrkiy dúnya mámleketleri arasında ilimiy, mádeniy-gumanitarlıq birge islesiwdi keńeytiw, ruwxıy jaqınlıqtı bekkemlew, ulıwma qádiriyat hám dástúrlerdi keńnen úgit-násiyatlawǵa qaratılǵan.
Bunnan soń jetekshilerge Qazaqstannıń sanlı sheshimleri hám Túrkiy mámleketler shólkemine aǵza mámleketlerdiń IT hám jasalma intellekt tarawındaǵı birgeliktegi baslamaları tanıstırıldı.