Ózbekstan Respublikası Prezidenti Shavkat Mirziyoev Túrkiy mámleketler shólkemine aǵza mámleketler delegaciyalarınıń basshıları menen birgelikte Túrkstan qalasınıń tariyxıy-mádeniy orayında boldı.
Joqarı mártebeli miymanlar Oraylıq Aziyadaǵı islam arxitekturasınıń jarqın esteliklerinen biri, Qazaqstannıń bas ruwxıy orayı bolǵan Xoja Ahmed Yassawiy maqbarasın zıyarat etti.
XIV ásirdiń aqırında Ámir Temurdıń buyrıǵına bola qurılǵan bul maqbara búgingi kúnde YuNESKOnıń Pútkil jer júzilik miyrası dizimine kirgizilgen bolıp, Oraylıq Aziyadaǵı orta ásir islam arxitekturasınıń eń siyrek ushırasatuǵın hám sawlatlı úlgilerinen biri bolıp esaplanadı. Onıń qurılısı 1389-1391-jıllarda baslanıp, XIV ásir aqırına shekem dawam etken. Kompleksti qurıwda Mawarawnnaxr ustaları, sonday-aq, basqa aymaqlardan kelgen arxitektor hám naǵıs oyıwshılar qatnasqan.
Jetekshiler ullı sufiy shayır hám oyshıldıń esteligine húrmet kórsetti.
Sonday-aq, delegaciyalardıń basshıları “Háziret Sultan” muzey-qorıqxanasınıń sapar etiw orayı menen tanıstı. Bul jerde zıyaratshılardı hám miymanlardı qabıl etiw, kórgizbeler shólkemlestiriw hám Túrkstannıń bay tariyxıy-mádeniy miyrasın kórsetiw ushın zamanagóy sharayatlar jaratılǵan. Orayda orta ásirler dáwirine baylanıslı siyrek ushırasatuǵın miyrastı saqlaw, úyreniw hám keńnen úgit-násiyatlawǵa qaratılǵan turaqlı muzey ekspoziciyası – “Siyrek ushırasatuǵın eksponatlar zalı” ayrıqsha orın iyeleydi.
Ekspoziciyada Xoja Ahmed Yassawiy mavzoleyi menen baylanıslı siyrek ushırasatuǵın tariyxıy estelikler, sonıń ishinde, XIV-XV ásirlerge tiyisli áyyemgi estelikler, orta ásirler arxitekturalıq hám ámeliy bezew kórkem óneri jáne gúlalshılıq úlgileri orın alǵan.
Bunday estelikler hám mádeniy joybarlar ruwxıy miyrastı qásterlep saqlawda, tariyxıy eske túsiriwlerdi bekkemlewde, uqsas tamırlar, isenim hám dástúrler menen baylanısqan tuwısqan xalıqlarımızdı jáne de jaqınlastırıwda úlken áhmiyetke iye ekeni atap ótildi.
ÓzA