Ámeliy sapar sheńberinde Ózbekstan Respublikası Prezidenti Shavkat Mirziyoev Qazaqstan Respublikası Prezidenti Qasım-Jomart Toqaev penen birgelikte Túrkstan qalasında Ózbekstan tárepinen qurılǵan meshit penen tanıstı.
Komplekstiń ulıwma maydanı 7 gektardan aslamdı quraydı, onda 5 mıńnan aslam adam namaz oqıwı múmkin. Saltanatlı ansambl tórt 70 metrlik minara jáne tiykarǵı zal hám dástúriy áywanlardı óz ishine alǵan úsh qabatlı bas imarattan ibarat.
Islam hám Shıǵıs arxitekturasınıń eń jaqsı dástúrlerine muwapıq qurılǵan jome meshitinde milliy naǵıslar, shıǵısqa tán gúmbezler, biyik minaralar hám zamanagóy qurılıs texnologiyaları úylesikli kórinis alǵan. Meshittiń ishki bezewinde islam kalligrafiyası hám naǵıs oyıw óneriniń úlgilerinen keńnen paydalanılǵan.
Átiraptaǵı 4,2 gektar maydandı abadanlastırıwǵa da ayrıqsha itibar qaratılmaqta. Bul jerde jasıl maydanlar, jollar, dem alıw orınları, jaqtılandırıw sistemaları, dekorativ qurılmalar hám fontanlar qurılmaqta.
Ózbekstan tárepinen tuwısqan Qazaqstan xalqı hám Túrkstan xalqına sawǵa sıpatında qurıp pitkerilgen bul sawlatlı kompleks eki mámleket arasındaǵı kóp ásirlik doslıq hám mádeniy jaqınlıq, jaqsı qońsıshılıq hám awqamlaslıq qatnasıqlarınıń ayqın kórinisi bolǵanı atap ótildi.
Quran ayatları oqılıp, tuwısqan xalıqlarımızǵa tınıshlıq hám abadanlıq tilep, pátiya etildi.
ÓzA