Húrmetli forum qatnasıwshıları!
Xanımlar hám mırzalar!
Bárinen burın, ánjumanǵa kelgen miymanlarımızdı shın kewlimnen qutlıqlap, bársheńizdi Aziya hayal-qızlarınıń ekinshi forumınıń ashılıwı menen qızǵın qutlıqlayman.
Ásirler dawamında ilim, mádeniyat hám civilizaciyalar tutasqan máńgi hám bárqulla náwqıran Buxara qalasında jıynalǵan siz, ázizlerge qızǵın sálemimdi hám eń jaqsı tileklerimdi bildiriwden quwanıshlıman.
Bul forumdı ótkeriw baslamasın qollap-quwatlap, ánjuman jumısına belsene qatnasıp atırǵan Birlesken Milletler Shólkemi hám onıń qánigelesken mákemelerine, barlıq xalıqaralıq shólkemlerge, Aziya mámleketlerinen kelgen parlament delegaciyalarınıń aǵzalarına, senator hám deputatlarǵa ayrıqsha minnetdarshılıq bildiremen.
Bizge belgili, Aziya xalıqlarınıń tariyxı, mádeniyatı, qádiriyatları bir-birine jaqın hám uqsas bolıp, bul tárep regionda barlıq tarawlardı óz-ara birlestiretuǵın, túrli millet hayal-qızların birge islesiwge shaqıratuǵın faktorlardan esaplanadı.
Búgin Aziya kontinentinde jasap atırǵan 5 milliardqa shamalas xalıqtıń derlik yarımın hayallar quraydı. Biz olardıń tımsalında tek ǵana gózzallıq iyelerin emes, al mámleketlerimizdiń rawajlanıwın jedellestiriw, xalıqlardıń abadanlıǵın arttırıw hám ádalatlı dúnyanı qurıw jolındaǵı úlken dóretiwshi kúshti kóremiz.
Sizlerdiń joqarı professionallıq sheberligińiz, bay bilim hám tájiriybeńiz, awızbirshilikke isenimli umtılısıńız tek ǵana keń regionımızda emes, al dúnya kóleminde hayal-qızlardıń huqıqları menen máplerin nátiyjeli qorǵawǵa xızmet etpekte.
Húrmetli ánjuman qatnasıwshıları!
Hayal-qızlardıń huqıqları menen erkinliklerin, máplerin támiyinlew, jámietlik-siyasiy belsendiligin arttırıw Jańa Ózbekstan reformalarınıń tiykarǵı baǵdarına aylandı. Sebebi, hayal-qızǵa itibar – bul, bárinen burın, insan shaxsına, onıń qádir-qımbatına bolǵan húrmettiń joqarı úlgisi bolıp esaplanadı. Hayal-qızlardıń jámiyettegi ornın bekkemlew tek ǵana siyasiy wazıypa emes, al erkin hám abadan jámiyet qurıw jolındaǵı izbe-iz demokratiyalıq jańalanıwlardıń ajıralmas bólegi bolıp tabıladı.
Sońǵı jılları elimizde gender teńlikti támiyinlew baǵdarında bekkem huqıqıy hám institucionallıq tiykar jaratıldı. Jańa redakciyadaǵı Konstituciya hám “Ózbekstan – 2030” strategiyası hayal-qızlardıń huqıqların, analıq hám balalıqtı qorǵawdıń institucionallıq kepilliklerin bekkemledi.
Keń kólemli reformalar nátiyjesinde hayal-qızlardıń mámleketlik basqarıwdaǵı úlesi 35 procentke, isbilermenlik tarawında 37 procentke, siyasiy partiyalar quramında bolsa 49 procentke jetip, Ózbekstan bul kórsetkish boyınsha xalıqaralıq reytinglerde jetekshi mámleketler qatarınan orın aldı. Atap aytqanda, Parlamentleraralıq Awqam tárepinen júrgiziletuǵın “Parlamenttegi hayal-qızlar” reytinginde respublikamız 193 mámleket arasında 35-orınǵa kóterildi.
Atqarıw hákimiyatı sistemasında basshı hayal-qızlar qatarınıń keńeyiwi hám jergilikli ózin-ózi basqarıw uyımlarındaǵı qatnasınıń artıwı mámleket tárepinen qararlar qabıl etiliwinde inklyuzivlikti támiyinlemekte.
Joqarı bilimlendiriw mákemeleri studentleri arasında hayal-qızlardıń úlesi keskin artqanın, sonıń ishinde, magistraturada oqıp atırǵan hayal-qızlardıń sanı sońǵı bes jılda 11 esege kóbeygenin reformalarımızdıń áhmiyetli strategiyalıq nátiyjesi dep bilemiz.
Ásirese, elimizde hayal-qızlardıń ekonomikalıq erkinligin támiyinlew rawajlanıwdıń tiykarǵı baǵdarlarınan birine aylandı. 2025-jılı 2,6 million hayal-qızdıń dáramatlı miynet penen bánt bolıwına járdem berildi. Ózbekstan usı jılı “Hayal-qızlar, biznes hám nızam” xalıqaralıq indeksinde óz poziciyasın 43 tekshege jaqsılap, 190 mámleket arasında 48-orındı iyelegenin qanaatlanıwshılıq penen atap ótpekshimen.
Húrmetli forum qatnasıwshıları!
Búgingi quramalı dáwirde hayal-qızlardıń ekonomikadaǵı qatnasın hám úlesin keskin arttırıw, mámleketlik hám jámiyetlik basqarıwdaǵı tásirin kúsheytiw, olardıń intellektuallıq potencialınan únemli paydalanıw áhmiyetli bolıp esaplanadı. Bul baǵdarda mámleketlerimiz isbilermen hayal-qızları arasındaǵı kóp tárepleme sheriklikti keńeytiwden, biznes forumlar hám xalıqaralıq treningler ótkerip barılıwınan mápdarmız.
Sonday-aq, mámleketlerimiz isbilermen hayal-qızlarınıń imkaniyatların jańa basqıshqa alıp shıǵıw maqsetinde turmısımızǵa jedel kirip kiyatırǵan jasalma intellekt hám sanlı texnologiyalardan paydalanıw kónlikpelerin úyretetuǵın, jańa startap joybarların qollap-quwatlaytuǵın platforma shólkemlestiriw usınısın alǵa qoyamız.
Erteń pútkil dúnyada “Xalıqaralıq shańaraq kúni” keńnen belgilenedi. Shıǵıs mámleketlerinde jámiyettiń bekkem tiykarı, qorǵanı bolǵan shańaraqlıq qádiriyat hám dástúrlerdi qásterlep saqlaw sońǵı jıllarda barǵan sayın áhmiyetli máselege aylanıp barmaqta. Bul forum sheńberinde mámleketlerimizdegi shańaraq institutın izertlew boyınsha ilimiy mákemeler tarmaǵın qáliplestirip, eń aldınǵı tájiriybelerdi óz-ara almasıw, álbette, óziniń kútilgen nátiyjesin beredi.
Ulıwma alǵanda, bul forum keleshekte Aziyada barlıq dárejede qararlar qabıl etiw procesinde hayal-qızlardıń rolin arttıratuǵın nátiyjeli sóylesiw maydanına aylanatuǵını sózsiz. Usı mánide, bul ánjuman sheńberinde sizler turaqlı rawajlanıwdı támiyinlew baǵdarında jańa baslama hám iygilikli ideyalardı jedel alǵa qoyıwıńızǵa bekkem isenemen.
Bársheńizge bekkem densawlıq, shańaraqlıq baxıt-ıǵbal hám áwmet, maqtanıshlı jumısıńızda tabıslar jetiskenlik, forum jumısına tabıslar tileymen.

Shavkat Mirziyoev,
Ózbekstan Respublikası Prezidenti