Húrmetli sammit qatnasıwshıları!
Xanımlar hám mırzalar!
Evraziya ekonomikalıq sammitiniń barlıq qatnasıwshıların qızǵın qutlıqlaw hám eń jaqsı tileklerimdi jollawdan oǵada quwanıshlıman.
Ótken on jıllar dawamında Sammit jetekshi siyasatshılar, isbilermen toparlar hám ekspertler jámiyetshiliginiń wákillerin birlestirgen áhmiyetli qarım-qatnas maydanı sıpatında ózin kórsetti.
Ánjumannıń Stambulda ótkeriliwi ayrıqsha rámziy mánige iye. Ásirler dawamında bul biytákirar qala Evropa hám Aziya arasında kópir bolıp, regionlararalıq mádeniy hám sawda-ekonomikalıq baylanıslardıń rawajlanıwına sheksiz úles qosıp keledi.
Búgingi kúnde zamanagóy Túrkiyada Prezident Rejep Tayyip Erdoǵannıń “Túrkiya ásiri” strategiyalıq ideyası tabıslı ámelge asırılıp atırǵanın ayrıqsha qanaatlanıwshılıq penen atap ótiwdi qáler edim.
Túrkiya globallıq kún tártibindegi áhmiyetli mashqalalardı nátiyjeli sheshiw jolında óz háreketlerin tolıq jumsap, xalıqaralıq qatnasıqlardıń isenimli hám abıraylı qatnasıwshısı sıpatında tásiri artıp barmaqta.
Prezident Erdoǵannıń isenimli umtılısları sebepli búgin Ózbekstan hám Túrkiya qatnasıqları keń kólemli strategiyalıq sheriklik dárejesine kóterildi.
Mámleketlerimiz arasındaǵı birge islesiwdiń eń tiykarǵı baǵdarları Evraziya ekonomikalıq sammitiniń tiykarǵı maqsetleri – teń huqıqlılıq, isenim hám óz-ara húrmetke tiykarlanǵan keń kólemli sheriklik hám turaqlı rawajlanıw principlerine tolıq sáykes keledi.
Húrmetli ánjuman qatnasıwshıları!
Bul retki Sammittiń tiykarǵı temalarınan biri sıpatında suw tamtarıslıǵı hám “jasıl” resurslar sharayatında globallıq juwapkershilik máselesi búgingi kúnde ayrıqsha áhmiyetke iye bolmaqta. Dúnya barǵan sayın kúsheyip baratırǵan klimat qáwip-qáterlerine, atap aytqanda, shólleniw, topıraq jemiriliwi, suw jetispewshiligi hám ekologiyalıq jaǵdaydıń jamanlasıwına dus kelmekte.
Oraylıq Aziyada bul processler ásirese keskin kórinbekte: temperaturanıń kóteriliw pátleri kórsetkishi dúnya kólemindegi ortasha normalardan joqarı bolıp, muzlıqlar jemirilip, topıraq degradaciyası kúsheymekte.
Bunday sharayatta ekologiyalıq turaqlılıqtı támiyinlew Jańa Ózbekstandı rawajlandırıwdıń eń tiykarǵı baǵdarlarınan birine aylandı.
“Jasıl mákan” joybarı sheńberinde hár jılı 200 million túp terek egilmekte, Aral teńiziniń qurıǵan ultanında bolsa úlken jasıl qorǵaw maydanları jaratılmaqta.
Biz rawajlanıwdıń jasıl modeline izbe-izlik penen ótpektemiz, bul processte zıyanlı shıǵındılar kólemin 35 procentke qısqartıp, 2035-jılǵa shekem olardı 50 procentke shekem azaytıwdı maqset etkenbiz.
Sonıń menen birge, suw resursların nátiyjeli basqarıw, sonıń ishinde, suwdı únemleytuǵın texnologiyalardı engiziw boyınsha ilajlar ámelge asırılmaqta. Bul bolsa hár jılı úlken muǵdardaǵı suw rezervlerin únemlew imkaniyatın beredi.
Ózbekstan bunnan bılay da “jasıl” kún tártibin jedel alǵa qoyıw hám globallıq ekologiyalıq qáwip-qáterlerdi nátiyjeli sheshiw jolların tabıwǵa úles qosıwdı jedel dawam ettiredi.
Usı múnásibet penen sizlerdi mámleketimizdegi xalıqaralıq ilajlarda, atap aytqanda, Samarqandta bolıp ótetuǵın Globallıq ekologiyalıq qor Assambleyasında hám Suwdı únemlew boyınsha pútkil jer júzilik forumda qatnasıwǵa mirát etemen.
Birgelikte ámelge asırılatuǵın háreketlerimiz xalıqaralıq klimat birge islesiwi kún tártibine, sonıń ishinde, BMShtıń klimat ózgeriwi boyınsha bolajaq konferenciyasına tayarlıq procesine ámeliy úles qosatuǵınına isenemen.
Qádirli ilaj qatnasıwshıları!
Ózbekstan keń kólemli birge islesiw ushın bárqulla ashıq hám keleshekte de turaqlı rawajlanıwdı támiyinlewge járdemlesiwge tayar.
Biz barlıq háreketlerimizdi birlestirgen halda ǵana búgingi hám keleshek áwladlar ushın abadan keleshekti támiyinley alamız.
Sammit qatnasıwshılarınıń jumısına áwmet hám úlken ámeliy nátiyjeler yar bolıwın tileymen.
Itibarıńız ushın raxmet.
Shavkat Mirziyoev,
Ózbekstan Respublikası Prezidenti