Prezident Shavkat Mirziyoev 8-may kúni Ekinshi jer júzilik urıs qatnasıwshıları hám miynet frontı veteranların zıyaratlap, bayram menen qutlıqladı.
Mámleketimiz basshısı Qurallı Kúshler Bas áskeriy klinikalıq gospitalında Akmal ata Akramov, Vera Juravskaya, Hasanbay ata Xalmatov hám Vladimir Alekseykov penen shın júrekten sáwbetlesti. Nuranıylardıń hal-jaǵdayı hám densawlıǵı menen qızıqtı. Olardıń mashaqatlı ómir jolın hám kórsetken mártliklerin ayrıqsha atap ótti.
– Sizler tariyxtıń janlı gúwasısız, mártlik tımsalısız. Sizdey teberik insanlar menen ushırasıw, násiyatlarıńızdı tıńlaw bizge úlken ruwxıy kúsh baǵıshlaydı. Xalqımız sizler menen orınlı túrde maqtanadı. Búgingi tınısh hám azat kúnler, áwladlardıń baxıtlı keleshegi sizlerdiń sheksiz pidayılıǵıńızdıń jemisi bolıp esaplanadı. Sizlerdiń ibratlı ómir jolıńız jaslarımız ushın haqıyqıy mártlik mektebi, – dedi Prezident.
Prezidenttiń usı jıldıń 16-aprelindegi qararına muwapıq, urıs hám miynet veteranlarına joqarı dárejede húrmet kórsetilmekte.
Ekinshi jer júzilik urıs qatnasıwshıları, front artı veteranları hám ǵárezsizlik jıllarında xızmet wazıypasın orınlaw waqtında qaytıs bolǵan áskeriy xızmetkerlerdiń shańaraq aǵzaları mámleketimizdiń turaqlı ǵamqorlıǵında. Olarǵa materiallıq hám ruwxıy járdem beriw menen birge salamatlıǵın tiklew ushın respublikamızdıń eń jaqsı sanatoriylarına jeńilletilgen jollamalar ajıratılǵan.
– Jaratqan iyemiz sizlerge watansúyiwshilik hám pidayı miynetińizdiń sıylıǵı sıpatında uzaq ómir, el-jurttıń ardaǵında jasaw baxtın inam etken. Sizlerdiń duwalarıńız elimiz ushın amanlıq, jumıslarımızǵa bereket, – dedi Prezidentimiz.
Ushırasıwda nuranıylar elimizde tariyxıy estelikti tiklew, kekselerdi qádirlew baǵdarında ámelge asırılıp atırǵan reformalar ushın mámleketimiz basshısına minnetdarshılıq bildirdi.
ÓzA