Ózbekstan Respublikası Prezidenti Shavkat Mirziyoev 8-may kúni paytaxtımızdaǵı Jeńis parkin barıp kórdi.
Ekinshi jer júzilik urıstıń tamam bolǵanına derlik 81 jıl boldı. Sonsha waqıt ótse de urıstıń ashshı tariyxı, ol keltirgen sheksiz qayǵı hám músiybetler adamzattıń yadınan shıqqanı joq. Kerisinshe, bul qorqınıshlı estelikler bizge tınıshlıq hám tatıwlıq qanshelli biybaha baylıq ekenin bárqulla esletip turadı. 9-may – Eslew hám qádirlew kúniniń negizinde mine, usınday mazmun jámlengen.
Mámleketimiz basshısı Jeńis parkinde usı sáne múnásibeti menen shólkemlestirilgen eslew máresiminde qatnastı.
Dástúrge muwapıq, Prezident Shavkat Mirziyoev “Mártlik gimni” esteligine gúl qoydı. Bul sawlatlı estelik urısta xalqımız shekken azap-aqıretlerdiń, mártlik hám joǵaltıwlardıń kórinisi bolıp esaplanadı.
Búgin aramızda saw-salamat jasap kiyatırǵan urıs hám miynet veteranları, barlıq nuranıylarımızǵa ayrıqsha mehirimiz, húrmetimizdi bildiremiz. Bul kompleks ullı jeńiske múnásip úles qosqan kóp milletli xalqımızdıń mártligin hám qaharmanlıǵın jırlaytuǵın teberik orın, desek, durıs boladı, – dedi mámleketimiz basshısı.
Maǵlıwmatlarǵa qaraǵanda, fashizmge qarsı qanlı urıslarda sol waqıtta 6 million 800 mıńdı quraǵan xalqımızdıń derlik 2 millionı qatnasqan. Sonnan 540 mıńǵa shamalası qaytıs bolǵan, 158 mıńı biydárek joǵalǵan, 50 mıńnan aslamı konclagerlerde misli kórilmegen qıynaw hám azaplar sebepli qaytıs bolǵan, 60 mıńnan aslamı mayıp bolıp qaytqan.
Ózbekstanlı ásker hám oficerlerden 214 mıńǵa shamalası jawıngerlik orden hám medallar menen sıylıqlanǵanı olardıń mártliginen derek beredi.
Mámleketimiz urıs jıllarında fronttıń bekkem támiyinlew bazasına aylanǵan, sawash maydanlarına oǵada úlken muǵdarda áskeriy texnika, qural-jaraq, kiyim-kenshek hám azıq-awqatlar jetkerip turılǵan. Oǵada awır sharayatqa qaramastan, xalqımız urıs aymaqlarınan kóshirip kelingen 1 million 500 mıńǵa shamalas adamdı, sonıń ishinde, ata-anasınan ayırılǵan 250 mıń jetim balanı óz qushaǵına alıp, mehir kórsetken.
Ilajda Ózbekstan Qurallı Kúshleri, mámleketlik hám jámiyetlik shólkemlerdiń wákilleri, máhálle belsendileri hám nuranıylar da qatnasıp, bul estelikke gúller qoydı.
Prezident Shavkat Mirziyoev Jeńis parkindegi “Millet pidayıları” qıyabanında da bolıp, ǵárezsizlik jıllarında elimizdi qorǵaw jolında qaytıs bolǵan áskeriy xızmetkerler hám huqıq qorǵaw uyımlarınıń xızmetkerleriniń esteligine húrmet kórsetti.
– Bir jıl aldın mine usı aymaqta “Millet pidayıları” kompleksin qurǵanımız, álbette, biykarǵa emes. Ol Watandı qorǵaw hár bir áwladtıń muqaddes isi ekenin, watansúyiwshilik dástúrleriniń dawamlılıǵın esletip turadı, – dedi Prezidentimiz.
Komplekste ǵárezsizlik jıllarında Watanımızdıń azatlıǵı, el-jurtımızdıń tınıshlıǵı jolında qaharmanlarsha qaytıs bolǵan 196 áskeriy xızmetker hám huqıq qorǵaw uyımları xızmetkerleriniń ismleri mórlep qoyılǵan.
Mámleketimiz basshısı ata-analarǵa mine usınday bahadır, batır perzentlerdi dúnyaǵa keltirip, haqıyqıy watansúygish etip tárbiyalaǵanı ushın tereń minnetdarshılıq bildirdi.
Xalqımız náwqıran jasında dushpanǵa qarsı ózin qalqan etken bunday pidayı qaharman ullarımızdı hesh qashan umıtpaydı. 2025-jıldıń ózinde bul kompleksti 650 mıńǵa shamalas jerlesimiz hám sırt elli miymanlar zıyarat etken.
Bul jerde kóplegen ruwxıy-aǵartıwshılıq ilajlar, tariyx, watansúyiwshilik, “Keleshek saatı” sabaqları ótkerilmekte. Bunday jumıslar, ruwxıy-tárbiyalıq áhmiyetke iye hám olardı dawam ettiriw zárúr ekenligi atap ótildi.
Bıyıl ullı Ámir Temur babamızdıń 690 jıllıq tuwılǵan kúni elimizde, sırt ellerde keńnen belgilenbekte.
Sahıpqıran babamızdıń mámleketshilik, mártlik hám qaharmanlıq jalını búgin de jaynap tur. Bul ullı dástúrdi márt ásker, oficer hám generallarımız múnásip túrde dawam ettirmekte. Olar biziń úlken baylıǵımız, Watanımızdıń isenimli hám bekkem qalqanları ekeni atap ótildi.
– Búgin bul jerde sap tartıp turǵan “Temurbekler mektepleri” oqıwshıları, márt áskerlerimiz tımsalında Alpamıs, Manguberdi hám Ámir Temurlardıń jańa áwladın kóremiz. Ullı babalarımızdıń bay miyrası, ilim hám tájiriybe mektebi tek ǵana muzeylerimiz emes, al qálbimizge de qaytpaqta. Olar tap qayta tirilip, Jańa Ózbekstandı, Úshinshi Renessanstıń tırnaǵın biz benen birge qurıp atırǵanday. Tashkenttegi Islam civilizaciyası orayın, Temuriyler tariyxı mámleketlik muzeyin, Samarqandtaǵı Imam Buxariy kompleksin barıp kórgen hár bir adam bunı tereń sezedi, – dedi Prezident Shavkat Mirziyoev.
Atap ótilgenindey, Watandı qorǵaw – mámleket hám xalıq ushın hesh qashan kún tártibinen shıqpaytuǵın másele. Bul bárshemiz ushın – muqaddes hám ullı wazıypa. Ásirese, búgingi oǵada qáwipli zamanda bul on ese, júz ese áhmiyetli bolıp barmaqta.
Bıyıl Watanımız ǵárezsizliginiń 35 jıllıǵı úlken saltanat penen belgilenedi. Bul ullı sáne “Bir Watan, bir xalıq bolıp, jańa turmıs hám keleshek quramız!” degen iygilikli súren tiykarında kútip alınıp atırǵanında, álbette, tereń máni bar.
– Búgin jaqın átirapımızdaǵı regionlarda bolıp atırǵan qarama-qarsılıq hám urıs-qaǵıslardı kórip turmız. Mine, usınday qıyın jaǵdayda milliy birlik hám tatıwlıqtı saqlaw – eń úlken kúsh, eń úlken baylıq ekenin turmıstıń ózi jáne bir márte tastıyıqlamaqta. Watandı qorǵaw – dúnyadaǵı eń ullı hám maqtanıshlı is. Bul haqıyqattı tereń ańlap, áskeriy antına bárqulla sadıq bolıp kiyatırǵan márt hám batır ullarımızǵa hár qansha alǵıs aytsaq arzıydı, – dedi mámleketimiz basshısı.
“Millet pidayıları” qıyabanı kúni-túni mártlik hawazı jańlap turatuǵın, tınıshlıq ushın gúreske shaqıratuǵın qutlı orın bolıp qalıwı, mıńlaǵan, millionlaǵan Watan qorǵawshıların tárbiyalawǵa xızmet etetuǵını atap ótildi.
Watan aldındaǵı minnetin orınlaw waqtında qaharmanlarsha qaytıs bolǵan ullarımızdıń shańaraq aǵzaları hám perzentlerine hár tárepleme ǵamxorlıq kórsetiw, olardı qollap-quwatlaw bunnan bılay da izbe-iz dawam ettiriledi.
ÓzA