Elimizde milliy qaharmanlarımızdıń mártligi hám pidayılıǵın máńgilestiriw, olardıń ibratlı ómir jolın jas áwladqa jetkeriw mámleketlik siyasattıń tiykarǵı baǵdarlarınan biri bolıp esaplanadı. Ásirese, Ekinshi jer júzilik urıstaǵı jeńistiń áhmiyetin tereń ańlaw, urıs jıllarında xalqımız kórsetken mártlik hám erlikti eslew hám keńnen úgit-násiyatlaw búgingi kúnde de óziniń áhmiyetin joǵaltpadı.
Ózbekstan Respublikası Prezidentiniń 2026-jıl 16-apreldegi «9-may – Eslew hám qádirlew kúnine tayarlıq kóriw hám onı ótkeriw ilajları haqqında”ǵı qararınıń orınlanıwın támiyinlew, sonday-aq, «Milliy tiklanish» demokratiyalıq partiyası Oraylıq Keńesi tárepinen islep shıǵılǵan rejege muwapıq, respublikamız boylap bir qatar ruwxıy-aǵartıwshılıq ilajlar ámelge asırılmaqta.
Mine, usınday ilajlardan biri Ájiniyaz atındaǵı Nókis mámleketlik pedagogikalıq institutında shólkemlestirildi. Onda «Qaraqalpaq xalqınıń Ekinshi jer júzilik urıstaǵı jeńiske qosqan úlesi» atamasında ilimiy-ámeliy dógerek sáwbetlesiwi bolıp ótti.
Ilajda Qaraqalpaqstan Respublikası Joqarǵı Keńesi hám jergilikli Keńes deputatları, «Milliy tiklanish» partiyası Qaraqalpaqstan Respublikası Keńesiniń wákilleri, instituttıń professor-oqıtıwshıları hám student-jaslar qatnastı.
Bul ilajdan gózlengen tiykarǵı maqset – urıs jıllarında qaraqalpaq xalqınıń frontta mártlik kórsetken qaharmanları, front artında kórsetken teńsiz mártligi, miynetkeshligi hám pidayılıǵın ilimiy tiykarda úyreniw, bul baǵdardaǵı tariyxıy haqıyqatlıqlardı jaslardıń sanasına jetkeriw, olardıń qálbinde Watanǵa muhabbat hám sadıqlıq sezimlerin bekkemlewden ibarat.
Ilajda Qaraqalpaqstan Respublikası Joqarǵı Keńesiniń deputatı O.Niyazova, Awǵan urısı qatnasıwshısı M.Jalelov, tariyxshı ilimpazlar hám izertlewshiler tárepinen qaraqalpaq xalqınıń Ekinshi jer júzilik urıs jıllarındaǵı qatnasıwı, jerleslerimizdiń fronttaǵı qaharmanlıǵı, front artındaǵı mashaqatlı miyneti, sonday-aq, urıs jıllarındaǵı awır sınaqlar hám olardı jeńip ótiwde kórsetilgen joqarı adamgershilik pazıyletleri haqqında hár tárepleme maǵlıwmatlar berildi.
Atap ótilgenindey, búgingi tınısh hám paraxat turmıs áne, usınday márt hám pidayı ata-babalarımızdıń qaharmanlıǵı esabınan qurılǵan. Sonıń ushın da, olardıń esteligin ulıǵlaw, tariyxıy haqıyqatlıqlardı qásterlep saqlaw hám keleshek áwladlarǵa jetkeriw hár birimizdiń muqaddes minnetimiz bolıp esaplanadı.
Qatnasıwshılar tárepinen bayanatlar boyınsha pikir-usınıslar bildirilip, jaslardı watansúyiwshilik ruwxında tárbiyalawda bunday ilajlardıń áhmiyeti ayrıqsha atap ótildi.
Á.Jiyemuratov,
Qaraqalpaqstan xabar agentligi