Ózbekstan “Adolat” SDP Qaraqalpaqstan Respublikası Keńesiniń 2025-jıl juwmaqları hám 2026-jıldıń birinshi sheregine baǵıshlanǵan esabat májilisi bolıp ótti.
Májilisti Ózbekstan “Adolat” SDP Qaraqalpaqstan Respublikası Keńesiniń baslıǵı Nurlıbay Qayıpbergenov basqarıp bardı hám partiya tárepinen islengen jumıslar, erisken nátiyjeler, jol qoyılǵan kemshilikler hám aldaǵı rejeler haqqında bayanat jasadı.
Bayanatshı tárepinen atap ótilgenindey, esabat dáwirinde partiya jumısında sezilerli belsendilik hám ósiw kózge taslandı. Atap aytqanda, 2025-jıl dawamında 36 jańa baslanǵısh partiya shólkemi shólkemlestirilip, 13 553 puqara partiya qatarına qabıl etildi. 2026-jıldıń birinshi shereginde bolsa jáne 2 jańa baslanǵısh partiya shólkemi dúzilip, 1 314 jańa aǵza partiya qatarına qosıldı. Bul sanlar aymaqlarda partiyaǵa bolǵan isenim artıp baratırǵanın ayqın kórsetedi.
Májilis dawamında atap ótilgenindey, partiyanıń jumısı tek ǵana sanlar menen emes, al ámeliy baslamalar menen de ólshenedi.
― Bizler ushın eń áhmiyetli kórsetkish bul sanlar emes, al adamlar turmısındaǵı unamlı ózgerisler bolıp esaplanadı. Hár bir baslamamız tikkeley xalıqtıń mashqalaların sheshiwge xızmet etiwi kerek, – dedi Nurlıbay Qayıpbergenov óz sózinde.
― Partiya tárepinen ámelge asırılǵan joybarlar jámiyetlik turmıstıń túrli tarawların qamtıp aldı, – Ózbekstan “Adolat” SDP Qaraqalpaqstan Respublikası Keńesi baspasóz xızmeti xatkeri Ábdiraxman Qoylıbaev. – Sonıń ishinde, huqıqıy sawatlılıqtı arttırıw, salamat turmıs tárizin úgit-násiyatlaw, bilimlendiriwdiń sapasın jaqsılaw hám korrupciyaǵa qarsı gúresiw baǵdarlarında alıp barılǵan jumıslar nátiyjesinde ótken jılı 1726 ilaj ótkerilip, oǵan 38177 puqara qatnastı. Sociallıq baǵdarlanǵan baslamalar sheńberinde “Bar mehrimiz saǵan, balajan!” súreni astında shólkemlestirilgen donorlıq akciyaları keń jámiyetshilikti birlestirdi. Eki márte ótkerilgen bul akciyada 574 donor qatnasıp, nátiyjede 258,4 litr donor qanı jıynaldı. Sonday-aq, partiya jumısınıń ashıq-aydınlıǵına hám jámiyetshilik penen pikirlesiwge ayrıqsha itibar qaratıldı. Ámelge asırılǵan jumıslar ǵalaba xabar qurallarında hám sociallıq tarmaqlarda keńnen sáwlelendirilip, xalıqtıń xabardarlıǵı arttırıldı. 2026-jıldıń birinshi shereginde de bul jumıslar turaqlı dawam ettirilip, 342 ilaj arqalı 6 372 puqara qamtıp alındı.
Deputatlıq jumısı sheńberinde aymaqlıq Keńeslerde áhmiyetli máseleler kóterilip, olardıń sheshimine qaratılǵan baslamalar alǵa qoyıldı.
Májilis juwmaǵında eń belsendi rayonlar hám belsendi baslamashı basshılar múnásip sıylıqlandı.
– Búgingi májiliste partiya Siyasiy Keńesiniń “Adolat” kókirek belgisi menen sıylıqlandım, – deydi Xojeli rayonlıq Keńesiniń baslıǵı Bazarbay Utambetov. – Aldaǵı waqıtları da ózime bildirilgen isenimdi aqlaw maqsetinde ayanbastan xızmet ete beremen.
Sonıń menen birge, Ámiwdárya, Moynaq hám Qaraózek rayonlıq Keńesleri 2025-jıldıń juwmaqları boyınsha eń úlgili rayonlıq Keńesler sıpatında tán alınıp, partiya Siyasiy Keńesiniń Húrmet jarlıǵı hám kompyuter toplamları menen sıylıqlandı.
Álbette, esabat májilisiniń juwmaqları Ózbekstan “Adolat” SDPnıń Qaraqalpaqstanda jámiyetlik turmısta siyasiy kúsh sıpatında belsene qatnasıwına hám óz ornın bekkemlewine tiykar jaratadı dep isenemiz.
Adilbay Orazov,
Qaraqalpaqstan xabar agentligi sholıwshısı