Prezident Shavkat Mirziyoev Ferǵana qalasındaǵı IT-park kompleksinde jaratılǵan sharayatlar menen tanıstı.
Bul kompleks mámleketimiz basshısınıń 2024-jıl avgust ayındaǵı saparı dawamında berilgen tapsırmaları tiykarında qurılǵan. 150 milliard sum byudjet qarjıları esabınan qurılǵan obekt bir waqıttıń ózinde 200 ge shekem paydalanıwshını qamtıp aladı. Jılına 3 mıńnan aslam jaslardı oqıtıw, olardı ámeliy joybarlarǵa tartıw hám IT xızmetlerin kórsetiw imkaniyatı jaratılǵan.
Orayda frilanserler hám programmistler ushın zamanagóy kovorking ortalıǵı, rezident kompaniyalar ushın tolıq úskenelengen ofisler shólkemlestirilgen. Bul jerde bilimlendiriw, óndiris hám xızmet kórsetiw processleri óz-ara baylanısqan halda jolǵa qoyılǵan. Jaratılǵan infrastruktura jaslardıń ózin-ózi bánt etiw imkaniyatların keńeytip, turaqlı dáramat tabıwına xızmet etedi.
Atap ótilgenindey, sońǵı jılları Ferǵana wálayatında IT xızmetleriniń kólemi 4 esege ósip, eksport 23 million dollardan artqan. Házirgi kúnde wálayatta “IT-Park” rezidentleriniń sanı 139 ǵa jetken. 2025-jılı 22,7 million dollarlıq málimleme texnologiyalarınıń xızmetleri eksport etilgen.
Jańa park sheńberinde rezidentler sanın 200 ge jetkeriw, 700 jańa jumıs ornın jaratıw, xızmetler kólemin arttırıw hám 30 million dollarlıq eksportqa erisiw maqset etilgen.
Keleshekte bul komplekste jasalma intellekt texnologiyaları xabın shólkemlestiriw, basqarıw sistemaların sanlastırıwǵa qaratılǵan joybarlardı ámelge asırıw názerde tutılǵan. Sonday-aq, jasalma intellekt, programmalastırıw, grafikalıq dizayn, kompyuter sawatlılıǵı hám inglis tili boyınsha zamanagóy oqıw kursları jolǵa qoyıladı. Startaplar ushın venchur qarjılandırıw, grantlar hám akseleraciya baǵdarlamaları engiziledi.
Prezidentimiz park rezidentleri hám málimleme texnologiyaları tarawında jumıs alıp barıp atırǵan jaslar menen sóylesti. Olar tárepinen alǵa qoyılǵan baslama hám ideyalar qollap-quwatlandı.
ÓzA