Prezident Shavkat Mirziyoev Ferǵana wálayatına saparı waqtında “Quva Agrostar” kárxanasınıń jumısı menen tanıstı.
Elimizdiń awıl xojalıǵında ónimdi jetistirip ǵana qalmastan, joqarı qosımsha qun jaratıw, qayta islew hám eksportqa baǵdarlaw kólemlerin arttırıwǵa ayrıqsha itibar qaratılmaqta. Usı maqsette “Uzagrostar xolding” kompaniyası shólkemlestirilip, onıń shólkemlestiriwinde 21 rayonda qánigelestirilgen agrar kompleksler jumıs basladı.
Tarawdaǵı tiykarǵı mashqalalardan biri óndiris shınjırınıń tarqalǵanlıǵı edi. Diyqan ónim jetistiretuǵın edi, biraq onı saqlaw, saylap alıw, qadaqlaw hám sırtqı bazarǵa shıǵarıw imkaniyatı sheklengen edi. Qánigelesken agrokompleksler bolsa mine usı boslıqtı tolıqtırmaqta.
Olardan biri “Uzagrostar xolding” kárxanası. Quva rayonında jaylasqan kompleks jılına 12 túrdegi 5 mıń tonna ónimdi jetistiriwden baslap, saqlaw, qayta islew, qadaqlaw hám eksportqa shekemgi processlerdi birden-bir shınjırda birlestirgen.
Kárxananıń Italiya, Ispaniya, Germaniya hám Qıtaydan alıp kelingen zamanagóy texnologiyaları hám Global GAP, ISO 22000, Halal hám HACCP sıyaqlı xalıqaralıq sertifikatları ónimniń sapası hám milliy brendke bolǵan isenimdi bekkemlewge xızmet etpekte.
Sistemalı qatnas nátiyjesinde 2025-jılı birinshi márte Yaponiya hám Qubla Koreya sıyaqlı talap joqarı bazarlarǵa aviatransport arqalı ónim eksport etildi. Usı jılı 25 million dollarlıq ónimdi sırtqı bazarǵa jetkeriw rejelestirilgen.
Rayondaǵı 33 máhálleden 3 mıń shańaraq hám 1 mıń diyqan xojalıǵı menen kooperaciya baylanısları jolǵa qoyılǵan. Adamlarǵa 10 sotıx qıytaq jerden 250 million sumǵa shekem dáramat alıw ámeliyatı úyrenilmekte.
Usı jerdiń ózinde xalıqqa qıytaq jerden nátiyjeli paydalanıwdı úyretiw hám máhállelerdi tereń qánigelestiriw baǵdarında ámelge asırılıp atırǵan jumıslar tanıstırıldı.
Qıytaq jer tek ǵana qosımsha dáramat deregi emes, al shańaraqlıq isbilermenliktiń nátiyjeli baǵdarına aylanıwı áhmiyetli ekeni atap ótildi. Xalıqqa tuqım tańlaw, agrotexnikalıq ilajlardı durıs orınlaw, sapalı ónim alıw, ónimdi bazar talabına muwapıq tayarlaw hám eksport standartlarına muwapıq qadaqlaw boyınsha ámeliy kónlikpeler beriw zárúr ekenligi kórsetip ótildi.
Mámleketimiz basshısı “Uzagrostar xolding” erisken nátiyjelerdi joqarı bahalap, jerden nátiyjeli paydalanıw, ónimdi tereń qayta islew hám eksportqa baǵdarlaw arqalı joqarı qosımsha qun jaratıw, eń áhmiyetlisi, diyqan hám qıytaq jer iyeleriniń dáramatın sezilerli dárejede arttırıw áhmiyetli ekenin atap ótti. Usı maqsette Ferǵana wálayatında 50 mıń gektar jer maydanında tájiriybe túrinde aldınǵı agrotexnologiyalarǵa tiykarlanǵan awıl xojalıǵı sisteması engiziletuǵını belgilendi.